Qoǵamdyq uıymdar Qazaqstannyń jáne Prezıdenttiń atynan memlekettik emes nagradalarmen marapattaı almaıdy
ASTANA. KAZINFORM — Qoǵamdyq uıymdarǵa Qazaqstannyń jáne Prezıdenttiń atynan memlekettik emes nagradalarmen marapattaýǵa jol berilmeıdi. Bul jaıynda Májilis depýtattarynyń saýalyna Premer-mınıstrdiń orynbasary — Ulttyq ekonomıka mınıstri Serik Jumanǵarınnyń jaýabynda aıtylǵan.
— 2025 jyly «Qazaqstan Respýblıkasynyń memlekettik nagradalary týraly» zańnyń 42-babyna ózgerister men tolyqtyrýlar engizildi.
Atap aıtqanda, qoǵamdyq birlestikterge, qoǵamdyq qorlarǵa, basqa da úkimettik emes uıymdarǵa syrtqy túri men ataýy memlekettik nagradalarǵa tolyqtaı nemese qandaı da bir bóligi uqsas ordender men medaldardy, omyraýǵa taǵatyn belgiler men olarǵa qosa beriletin qujattardy taǵaıyndaýǵa jáne jasaýǵa tyıym salý normalary kózdeldi.
Sondaı-aq Qazaqstan Respýblıkasynyń, Qazaqstan halqynyń jáne Memleket basshysynyń atynan memlekettik emes nagradalarmen nagradtaýǵa jol berilmeıdi.
Bul rette Mádenıet jáne aqparat mınıstrligi elimizde tirkelgen 20 myńǵa jýyq qoǵamdyq uıymǵa turaqty túrde taldaý jáne monıtorıng jumystaryn júrgizedi, — dedi Serik Jumanǵarın.
Vıtse-premerdiń atap ótýinshe, qazirgi tańda Mádenıet mınıstrligi halyqaralyq, onyń ishinde TMD elderiniń tájirıbesin zerdeleı otyryp, «Qoǵamdyq birlestikter týraly» jáne «Kommertsııalyq emes uıymdar týraly» zańdarǵa ózgerister men tolyqtyrýlar engizý úshin zań jobasyn ázirlep, pysyqtap jatyr. Ondaǵy normalar qoǵamdyq birlestikterdiń, qoǵamdyq qorlardyń, basqa da úkimettik emes uıymdardyń nagradalaryna qoıylatyn talaptardy kúsheıtýge baǵyttalǵan.
— Zań qabyldanǵan jaǵdaıda qoǵamdyq birlestikter elimizdiń jáne shetel azamattaryn qoǵamdyq uıymdarǵa sińirgen eńbekteri úshin ǵana ózderiniń nagradalarymen marapattaýǵa quqyly bolady. Buǵan qosa qoǵamdyq uıymdardyń marapattaryn tirkeýge qatysty máseleni Qazaqstan Respýblıkasynyń Konstıtýtsııasyna jáne «Qoǵamdyq birlestikter týraly» zańyna sáıkes elimizde tirkelgen barlyq qoǵamdyq birlestik, ártúrli qoǵamdyq qorlar jáne basqa da kommertsııalyq emes uıymdarmen talqylanady, — dedi ol.
Budan bólek, Serik Jumanǵarın elimizde «Qazaqstan Respýblıkasynyń memlekettik nagradalarynyń aqparattyq júıesi» platformasy jumys isteıtindigine nazar aýdartady.
— Sondaı-aq áskerı, arnaýly memlekettik, quqyq qorǵaý jáne ortalyq atqarýshy organdardyń vedomstvolyq nagradalaryn esepke alý jáne salany júıeleý maqsatynda Qazaqstan Respýblıkasy Prezıdenti Іs basqarmasymen birlese otyryp, «Vedomstvolyq nagradalardyń aqparattyq júıesi» platformasy jasaldy. Aqparattyq júıede árbir memlekettik organnyń ózine tıesili medaldary men tósbelgileriniń jalpy sany, tabystalǵan adamdar jáne olardy berý negizdemeleri týraly aqparattar, vedomstvolyq nagradalardy tabystaý jónindegi komıssııa týraly málimetter qamtylatyn bolady, — dedi ol.
Buǵan deıin pedagogter medaldi nege satyp alatyny týraly jazǵan edik.