Qoǵamdyq tyńdaýdan bas tartýǵa bolmaıdy – Ekologııa mınıstrligi depýtattyń usynysyna jaýap berdi
ASTANA. KAZINFORM – Ekologııa jáne tabıǵı resýrstar mınıstrligi Kazinform saýalyna bergen jaýapta Májilis depýtaty Temir Qyryqbaevtyń usynysyna vedomstvonyń resmı ustanymyn bildirdi.
Eske salsaq, 12 qarashadaǵy Májilis jıynynda depýtat ken qazýǵa ruqsat alý úshin qoǵamdyq tyńdaý ótkizý talabyn ózgertý týraly bastama kótergen bolatyn.
Onyń paıymdaýynsha, zańsyz ken qazýdy kásip etken jergilikti turǵyndar paıdaly qazbaǵa baı oryndardy zańdy jolmen ıgergisi keletinderge qoǵamdyq tyńdaý ınstıtýty arqyly qasaqana kedergi keltirýdi ádetke aınaldyrǵan.
— Paıdaly qazbalardy jergilikti aýyl turǵyndary eshbir lıtsenzııa almaı-aq qazyp jatqan jaıttar kóbeıip keledi. Bizge sondaı shaǵymdar túsip jatyr. Al zańǵa baǵynatyn kásipkerler jerdi aýktsıonnan alyp, lıtsenzııasyn rásimdep, Ekologııa mınıstrliginiń ruqsatyn alyp, salyq tóleýshi retinde kompanııasyn sol jerge tirkeıdi. Eń sońynda qoǵamdyq tyńdaý ótkizgen kezde jer qoınaýyn zańsyz ıgerip júrgenderdiń ókilderi 50-60 adam bolyp kelip, kezdesýdiń shyrqyn buzady. Osylaısha bárin zańdy rásimdegen kásipkerler qaıtyp ketip jatyr. 3-4 jyldan beri osyndaı problema paıda boldy. Osyǵan baılanysty Ekologııa kodeksiniń 96-babynan qoǵamdyq tyńdaýdy alyp tastap, ruqsat berý sheshimin jergilikti ýákiletti organǵa berýdi usynǵanmyn. Soǵan Ekologııa mınıstrligi men sizdiń ustanymyńyzdy bilgim keledi, - degen edi depýtat.
Ónerkásip jáne qurylys mınıstriniń orynbasary Iran Sharhan bul máseleni birge retteýge ázir ekenin, qoǵamdyq tyńdaý ınstıtýty «ekologııalyq baǵyttan ekonomıkalyq baǵytqa oıysyp ketkenin» aıtqan.
Májilis otyrysynda Ekologııa jáne tabıǵı resýrstar mınıstrliginiń ókilderi bolǵanymen, depýtattyń bastamasyna qatysty vedomstvo usynysy sol jerde aıtylmaı qalǵan. Osyǵan baılanysty Kazinform joldaǵan saýalǵa mınıstrliktiń Ekologııalyq mádenıet jáne saıasat departamentiniń dırektory Dáýlet Esmaǵambetov jaýap berdi.
- Qazaqstan Respýblıkasynyń Ekologııalyq kodeksinen qoǵamdyq tyńdaýlar ınstıtýtyn alyp tastaý eldiń halyqaralyq mindettemelerine qaıshy keledi jáne halyqaralyq quqyq pen ulttyq quqyqtyń ózara úılesimdiligi týraly konstıtýtsııalyq prıntsıpterdi buzady, - deıdi ol.
Spıker Qazaqstan Orhýs konventsııasynyń erejelerin oryndaýǵa mindetti ekenin eske saldy. Elimiz «Azamattardyń ekologııalyq aqparatqa qoljetimdiligi, sheshim qabyldaý protsesine halyqtyń qatysýy jáne ekologııalyq máseleler boıynsha sotqa júginý quqyǵy týraly» Orhýs konventsııasyn 2000 jyly ratıfıkatsııalaǵan.
- Konstıtýtsııanyń 4-babynda ratıfıkatsııalanǵan halyqaralyq kelisimder zańnamadan basym turatyny jáne tikeleı qoldanýǵa jatatyny aıtylǵan. Tek keıbir jaǵdaılarda zań qabyldaý qajet bolǵanda ǵana erekshelik jasalady. Demek, ulttyq zańnamadaǵy kez kelgen ózgerister, sonyń ishinde Ekologııalyq kodeks te ratıfıkatsııalanǵan halyqaralyq mindettemelerge qaıshy kelmeýi kerek, - deıdi mınıstrlik ókili.
Onyń aıtýynsha, Temir Qyryqbaevtyń bastamasy Orhýs konventsııasyna qaıshy.
- Konventsııanyń 6-baby memleketterdi qorshaǵan ortaǵa aıtarlyqtaı áser ete alatyn qyzmet týraly sheshim qabyldaýǵa qoǵamnyń erte, tıimdi jáne naqty qatysýyn talap etedi. Halyqtyń eskertýler men usynystar berý múmkindigin, qabyldanǵan sheshimderge jurtshylyqtyń áser etý tetikterin kózdeıdi. Qoǵamdyq tyńdaý – osy atalǵan talaptardy oryndaýdyń negizgi, resimdelgen jáne tıimdi tetigi. Ondaı tetikti alyp tastaý jurtshylyqty sheshim qabyldaýǵa qatysýdyń praktıkalyq quralynan aıyrady. Al bul – 6-bapty tikeleı buzý. Al halyqty ekologııalyq mańyzdy aqparattan shekteý konventsııanyń 4 jáne 6-babyna qaıshy, - deıdi Dáýlet Esmaǵambetov.
Departament dırektory qoǵamdyq tyńdaý tetigi arqyly halyq ekologııalyq mańyzy bar aqparatqa der kezinde qol jetkizip, jobalardyń qorshaǵan ortaǵa yqtımal áserin túsinýge, táýekelderdi anyqtap, saldaryn azaıtýǵa múmkindik alatynyn aıtady.
- Qoǵamdyq tyńdaýdan bas tartý azamattardyń aqparat alý múmkindigin shekteıdi jáne memlekettiń ekologııalyq mańyzy bar derekterdiń ashyqtyǵyn qamtamasyz etý jónindegi mindettemelerine qaıshy keledi. Ekologııalyq kodekstegi kez kelgen ózgerister Qazaqstan Respýblıkasynyń halyqaralyq mindettemelerine sáıkes kelýi tıis. Qoǵamdyq tyńdaýlardy alyp tastaý bul mindettemelerge sáıkes kelmeıdi jáne Orhýs konventsııasynyń oryndalýyn baqylaıtyn halyqaralyq uıymdardyń talap-aryzdar túsirýine ákelýi múmkin, - deıdi ol.
Aıta keteıik, Qazaqstan endi shaǵyn ken oryndarynyń áleýetin ashýda jańa tetikterdi qoldanady.