Qoǵamdyq tamaqtaný salasynda neshe adam ruqsatsyz jumys istegen
ASTANA. KAZINFORM – Jyl basynan qoǵamdyq tamaqtaný oryndarynda ruqsatsyz jumys istegen 200-ge jýyq adam anyqtaldy. Bul derekti Densaýlyq saqtaý mınıstrligi Sanıtarııalyq-epıdemıologııalyq baqylaý komıteti málim etti.
Olarǵa qatysty qandaı jaza qarastyrylǵan?
- QR Densaýlyq saqtaý mınıstriniń 2022 jylǵy 17 aqpandaǵy buıryǵymen bekitilgen «Qoǵamdyq tamaqtaný obektilerine qoıylatyn sanıtarııalyq-epıdemıologııalyq talaptar» sanıtarııalyq qaǵıdalarynyń 293-tarmaǵyna sáıkes, tamaqtaný obektisiniń personaly medıtsınalyq tekserýden ótýi tıis. Osy jyly tirkelgen jappaı tamaqtan ýlaný jaǵdaılary boıynsha medıtsınalyq tekserýsiz jumys istegen jáne bakterııa tasymaldaý boıynsha zerthanalyq oń nátıje anyqtalǵan 197 qyzmetkerge qatysty ýaqytsha jumystan shettetý týraly 66 qaýly shyǵaryldy. Olardyń jumys berýshilerine tıisti ákimshilik shara qoldanyldy, - delingen vedomstvonyń Kazinform agenttigine bergen jaýabynda.
Atap aıtqanda, adamdar tamaqtan ýlanǵan jaǵdaıda, shuǵyl kómek pen odan arǵy emdeý mindetti áleýmettik medıtsınalyq saqtandyrý júıesi aıasynda júzege asyrylady. Eger, sotqa deıingi tergep-tekserý nátıjesi boıynsha sot sheshimimen qylmystyq quqyq buzý belgileri bolǵan jaǵdaıda, sýbekt zardap shekkenderdiń materıaldyq zalalyn óteýi múmkin.
Budan buryn habarlanǵandaı, jyl basynan elde 400-den astam adam astan ýlandy.
Eske salsaq, Túrkistanda adamdar sýshıdan ýlanǵan kafe qaıtadan zańsyz jumys istegen.