Qoǵamdyq tamaqtaný oryndarynan 94 keli qaýipti ónim tárkilendi
ASTANA. KAZINFORM — Elimizde sanıtarııalyq talaptarǵa saı kelmeıtin 94 keliden astam azyq-túlik ónimderi aınalymnan alyndy. Sonymen qatar 6 qoǵamdyq tamaqtaný nysanynyń jumysy toqtatyldy. Bul týraly Ortalyq kommýnıkatsııalar qyzmetinde ótken brıfıngte QR Densaýlyq saqtaý mınıstrligi Sanıtarııalyq-epıdemıologııalyq baqylaý komıtetiniń tóraǵasy Sarhat Beısenova málimdedi.
Onyń aıtýynsha, jedel den qoıý sharalary aıasynda sanıtarııalyq-epıdemıologııalyq qyzmet birqatar nysanda anyqtalǵan zańbuzýshylyqtarǵa baılanysty tıisti sharalar qabyldaǵan.
— Sanıtarııalyq-epıdemıologııalyq qyzmet 6 nysannyń qyzmetin toqtatý týraly qaýly shyǵardy. Mindetti medıtsınalyq tekserýden ótpegen qyzmetkerlerdi jumystan shettetý jóninde 4 qaýly qabyldandy. Sonymen qatar qaýipsizdik talaptaryna sáıkes kelmeıtin 94 keliden astam ónim aınalymnan alyndy, — dedi Sarhat Beısenova.
Spıkerdiń sózinshe, qazir sanıtarııalyq-epıdemıologııalyq qyzmet qoǵamdyq tamaqtaný salasyndaǵy 20 myńnan astam nysandy turaqty baqylaýda ustap otyr.
— Bıylǵy jyldyń alǵashqy bes aıynda 600-den astam tekserý júrgizildi. Onyń qorytyndysy boıynsha jalpy somasy 50 mıllıon teńgeden asatyn ákimshilik aıyppul salyndy, — dedi komıtet tóraǵasy.
Eske salaıyq, buǵan deıin Astanada bıylǵy alǵashqy bes aıda jiti ishek ınfektsııalarymen syrqattaný kórsetkishi ótken jyldyń sáıkes kezeńimen salystyrǵanda 10 paıyzǵa tómendegenin jazǵan edik.
