Qoǵamdyq tamaqtaný oryndary boıynsha Almaty, Astana qalalary kósh bastady

ASTANA. KAZINFORM — Qazaqstanda qoǵamdyq tamaqtaný oryndarynyń sany artty. Bul týraly Ulttyq statıstıkalyq bıýro málim etti.

— 2024 jyly elimizde 16 674 qoǵamdyq tamaqtaný orny tirkelgen, bul 2023 jylmen salystyrǵanda 5,4% kóp (ol kezde 15 826 nysan bolǵan). Qoǵamdyq tamaqtaný oryndarynyń eń kóp sany — Almaty (2 427 mekeme), Astana (2 252) qalalary jáne Qaraǵandy oblysynda (1 333), — delingen habarlamada.

Tamaqtaný oryndarynyń ishinde meıramhanalardyń sany aıtarlyqtaı ózgermegen — bir jyl ishinde 55 birlikke artyp, 2 358-ge jetken. Ashanalardyń sany 4,3% ósip, 5 383-ten 5 618-ge deıin jetken. Eń joǵary ósim kafeler arasynda, olardyń sany 4 479-dan 5 202-ge deıin kóbeıip, 16,1% artqan. Meıramhanalardyń eń kóp sany Astanada (524), Almatyda (446) jáne Aqtóbe oblysynda (161) shoǵyrlanǵan.

Kafeler sany boıynsha Astana (643), Almaty (618) jáne Qaraǵandy oblysy (589) kósh bastap tur. 2024 jyly tamaqtaný jáne sýsyn boıynsha kórsetilgen qyzmetter kólemi 1,5 trln teńgeni qurady.

Aıta ketelik, Túrkistan oblysyndaǵy qoǵamdyq tamaqtaný oryndarynda ýlaný jaǵdaılary jıilegen.