Qoǵamdyq palata sybaılas jemqorlyqqa qarsy zań jobasyn talqylady
ASTANA. KAZINFORM – Búgin Májilis janyndaǵy Qoǵamdyq palatanyń músheleri depýtattarmen jáne sarapshylarmen Sybaılas jemqorlyqqa qarsy is-qımyl máseleleri týraly zań jobasy men oǵan ilespe túzetýlerdi talqylady. Bul týraly QR Parlamentiniń baspasóz qyzmeti jazdy.
Sybaılas jemqorlyqqa qarsy is-qımyl agenttigi tóraǵasynyń birinshi orynbasary Ulan Sarqulov zań jobalaryndaǵy normalarmen tanystyrdy. Onyń aıtýynsha, túzetýler arqyly Sybaılas jemqorlyqqa qarsy saıasat tujyrymdamasy ishinara júzege asyrylady. Negizgi zań jobasy alty baǵytty qamtıdy. Jalpy úsh kodeks pen bes zańǵa ózgerister men tolyqtyrýlar, Ákimshilik quqyq buzýshylyq týraly kodekske ilespe túzetýler engiziledi.
Baıandamany tyńdaǵan soń Qoǵamdyq palata músheleri men jıynǵa qatysýshylar túzetýlerge qatysty óz pikirlerin ortaǵa saldy. Qazaqstandaǵy parlamentarızmdi damytý qorynyń prezıdenti Záýresh Battalova zań jobasyn qoldady. Onyń pikirinshe, bastama ýaqyt talabyna saı, biraq usynylǵan standarttardyń tıimdiligi qaıta qaraýdy qajet etedi.
Sonymen qatar Májilis depýtattary Marat Báshimov pen Ekaterına Smyshlıaeva, «Ádilet joly» qoǵamdyq birlestiginiń dırektory Dıdar Smaǵulov, «Jańarý» sybaılas jemqorlyqqa qarsy jalpyulttyq qozǵalysynyń tóraǵasy Mels Semǵalıev jáne t.b. zań jobalaryn jetildirý boıynsha usynystaryn aıtty.
Kezdesý sońynda Aıdos Sarym talqylaýǵa qatysqandarǵa alǵysyn bildirip, jumys toby aıasynda sybaılas jemqorlyqqa qarsy zań jobalarymen belsendi jumys isteýge shaqyrdy.
