Qoǵamdyq palata óńirlerde kóshpeli otyrystar ótkizedi
ASTANA. KAZINFORM — Quryltaı janyndaǵy Qoǵamdyq palata jergilikti qoǵamdastyqtardyń, máslıhat depýtattary men qoǵamdyq keńesterdiń bastamasymen óńirlerde kóshpeli otyrystar ótkize alady. Bul týraly Quryltaı otyrysynan keıingi baspasóz máslıhatynda depýtat Aıdos Sarym aıtty.
— Bizde kóshpeli otyrystar bolǵan. Máselen, Almatydaǵy páter ıeleri koperatıvterine qatysty máselede aýlaǵa jınalyp, ony alǵash ret sol jerde qarastyrdyq. Keıin arnaıy alańǵa baryp, máseleni egjeı-tegjeıli talqyladyq. Teorııalyq turǵydan alǵanda, jergilikti qoǵamdastyqtar, máslıhattaǵy áriptesterimiz nemese qoǵamdyq keńester osyndaı máseleni kóterip, bastama jasaı alady, — dedi Aıdos Sarym Kazinform tilshisiniń saýalyna oraı.
Ol mundaı is-sharalardy ótkizý uıymdastyrýshylyq múmkindikterge baılanysty bolatynyn atap ótti. Sondaı-aq Qoǵamdyq palatanyń jumys kestesimen Quryltaıdyń saıtynan tanysýǵa bolatynyn aıtty. Ol úshin arnaıy jeke paraqsha ashylyp, onda is-sharalar jospary, otyrystardyń stenogrammalary, materıaldar men sarapshylardyń usynystary jarııalanady.
— Mysaly, naýryz aıynda belgili bir zań jobasyn talqylaý nemese Aqmola oblysynda kóshpeli otyrys ótetinin bilýge bolady. Sonymen qatar baspasóz qyzmetimiz belsendi jumys isteıdi. Sizder kún saıyn aqparattyq habarlamalar alyp otyrasyzdar. Saıtqa kirip, is-sharalardyń kúnderi men taqyryptaryn bile alasyzdar. Biz apta saıyn is-sharalar kestesin jarııalap otyramyz, — dedi Aıdos Sarym.
Buǵan deıin Aıdos Sarym Qoǵamdyq palata men Halyq Keńesiniń mindetteri bir-birin qaıtalamaıtynyn aıtqan edi.
