Qoǵamdyq oryndarda kalıan tartýǵa baqylaýdy kúsheıtý kerek - Dáýlet Turlyhanov

ASTANA. KAZINFORM – Búgin Májilistiń jalpy otyrysynda Dáýlet Turlyhanov kalıan qoıyp júrgen kóńil kóteretin oryndar kóbeıip ketkenin aıtty.

«Qazir paıdasynan zııany kóp elektrondy temeki, sıntetıkalyq esirtki, energetıkalyq sýsyn sekildi zııandy zattar kúnnen kúnge kóbeıip barady. Solardyń biri – kalıan. Bul zatty arnaıy kóńil kóteretin, tamaqtanatyn oryndarda qoıyp, jastar kólikke salyp alyp júretin jaǵdaıǵa jetti. Kalıandy qoǵamdyq oryndarda qoıýǵa zań júzinde tyıym bar. Alaıda, bul norma oryndalmaı otyr. Óıtkeni, 3 jyl boıy kásipkerlik sýbektilerin tekserýge moratorıı boldy. Tekseristi toqtatý degen - zańdy buzýǵa negiz emes. Al kalıannyń quramynda ne bar ekeni, ne qosyp jatqany múldem belgisiz. Oǵan temekiden bólek, túrli aromatızatorlar, masaıtatyn zattar qosylatyny jasyryn emes. Oǵan gashısh te, alkogol de qosýy ábden múmkin. Ony qadaǵalap jatqan kim bar?», - dedi D.Turlyhanov Úkimet basshysy orynbasary Tamara Dúısenovanyń atyna joldaǵan saýalynda.

Onyń paıymynsha, Іshki ister mınıstrligi qoǵamdyq oryndarda kalıan boıynsha baqylaýdy kúsheıtýi tıis.

«Densaýlyq saqtaý mınıstrligi elimizdegi kalıannyń quramyna, tútinine saraptama jasap, onyń adam densaýlyǵyna tıgizetin zııany boıynsha qorytyndy ázirleýi tıis. Sonymen qatar, Úkimet elimizde kalıanǵa múldem tyıym salýdy jáne talaptardy buzǵandardy jazalaýdy eskeretin zań jobasyn ázirleýi qajet», - dedi depýtat.

Budan buryn habarlanǵandaı, Májilis veıpterge tyıym salatyn zańdy qabyldady.