Qoǵamdyq orynda masań kúıde júrgender qalaı jazalanady
ASTANA. KAZINFORM – Elordada beınebaqylaý kameralarynyń sany kóbeımek. Bul týraly Astana qalasy PD qaýipsizdik bóliminiń basshysy Jánibek Isaev «Búgin Live» baǵdarlamasynda aıtty.
Onyń sózinshe, jańa kameralar qoǵamdyq keńistikterdegi quqyq buzýshylyqtardy, sonyń ishinde aıaldama, qoqys jáshigi, oryndyq jáne basqa da abattandyrý nysandaryn búldirý, sondaı-aq qoǵamdyq orynda masań kúıde júrý faktilerin anyqtaýǵa múmkindik beredi.
– Bul áreketter boıynsha quqyq buzýshyǵa QR Ákimshilik kodeksiniń 434-baby boıynsha hattama toltyrylady. 10 AEK ákimshilik aıyppul nemese 20 saǵattyq qoǵamdyq jumysqa tartý kózdelgen, – dedi Jánibek Isaev.
Eger quqyq buzýshylyq bir jyl ishinde qaıtalansa, 20 AEK aıyppul salynady nemese 80 saǵattyq qoǵamdyq jumysqa tartylady.
Qazir Astanada 60 myń beınebaqylaý kamerasy bar. Olardyń kómegimen qoǵamdyq jáne kommýnaldyq múlikti búldirgen 143 adam jaýapqa tartylǵan. Al qoǵamdyq oryndardy lastaý boıynsha 928 ákimshilik quqyq buzýshylyq tirkelgen. Kameralar vandalızm faktilerin anyqtaýda da qoldanylady.
– Jýyrda Memleket basshysy vandalızmmen kúresti kúsheıtip, kameralardyń sanyn arttyrýdy tapsyrdy. Jalpy, vandalızm QR Qylmystyq kodeksiniń 294-baby boıynsha qýdalanady. Bıyl Astanada bir ǵana jaǵdaı tirkeldi. Ol Baıqońyr aýdanynda bolǵan, – dedi spıker.
Beınebaqylaý júıesi el boıynsha da keńeıip keledi. Qazir Qazaqstanda 1,6 mıllıonnan astam kamera jumys isteıdi. Onyń 90 myńǵa jýyǵy polıtsııanyń Jedel basqarý ortalyqtaryna qosylǵan, al 27 myńǵa jýyq kamera derekterdi avtomatty túrde taldaı alady.
Jasandy ıntellekt elementteri bar mundaı júıeler izdeýde júrgen, buryn qylmys jasap jaýapqa tartylǵan nemese jaýapkershilikten jaltarýǵa tyrysqan adamdardy anyqtaýǵa múmkindik beredi.
Eske salaıyq, Astananyń 30 jastaǵy turǵyny óltirilgennen keıin tórt polıtsııa qyzmetkeri jumysyna salǵyrt qarady degen kúdikpen ustaldy.
