Qoǵamdyq marapattar tapsyrý jaǵdaılary jıilep ketken – Erlan Karın
ASTANA. KAZINFORM – Memlekettik keńesshi Erlan Qarınniń tóraǵalyǵymen Memlekettik rámizder men vedomstvolyq jáne olarǵa teńestirilgen ózge de nagradalar geraldıkasy máseleleri jónindegi respýblıkalyq komıssııanyń kezekti otyrysy ótti,- dep habarlaıdy Aqorda.
Komıssııa jumysyna Parlament depýtattary, ortalyq jáne jergilikti atqarýshy organdardyń basshylary, belgili qoǵam qaıratkerleri jáne ǵalymdar qatysty.
Jıynda Mádenıet jáne aqparat mınıstri Aıda Balaevanyń memlekettik rámizderdi nasıhattaý men qoldaný baǵytynda atqarǵan jumystardyń jaı-kúıi jáne qoldanystaǵy zańnamalyq normalarǵa sáıkestendirý úshin memlekettik organdardyń keıbir vedomstvolyq nagradalaryna ózgeris engizý týraly usynysy tyńdaldy.
Memlekettik komıssııa otyrysynda Memlekettik qyzmet isteri agenttiginiń, Tótenshe jaǵdaılar, Ónerkásip jáne qurylys mınıstrlikteriniń, Memlekettik kúzet qyzmetiniń usynǵan vedomstvolyq nagradalary boıynsha oń sheshim qabyldandy. Sonymen qatar keıbir memlekettik organdar usynǵan vedomstvolyq nagradalarǵa qatysty eskertýler aıtyldy.
Erlan Qarın ýákiletti organǵa óńirlik nyshandardy ázirleý men bekitý júıesin retke keltirý boıynsha úlgilik qaǵıda jáne Memlekettik rámizderdiń qoldanylýy men nasıhattalýyn odan ári arttyrýǵa baǵyttalǵan keshendi jospar ázirlep, olardy Úkimet arqyly bekitý qajet ekenin atap ótti.
«Sońǵy ýaqytta jekelegen azamattar men qoǵamdyq uıymdar tarapynan memlekettik nagradalardyń atyn, keskinin, keıbir elementterin qaıtalaıtyn qoǵamdyq marapattar tapsyrý jaǵdaılarynyń jıilep ketkenine jáne osyndaı áreketterge quqyqtyq negizde tosqaýyl qoıý kerek» — dedi Memlekettik keńesshi.
Osyǵan oraı, Mádenıet jáne aqparat, Ádilet mınıstrlikterine tıisti tapsyrmalar berildi.
Sonymen qatar Komıssııa otyrysynyń qorytyndysy boıynsha ortalyq memlekettik organdar men jergilikti ákimdikterge birqatar hattamalyq tapsyrma júkteldi.
