Qoǵamdyq kólik pen arnaıy tehnıkany jańartýǵa 109 mıllıard teńge qajet – mınıstr

ASTANA. KAZINFORM – Ónerkásip jáne qurylys mınıstri Ersaıyn Naǵaspaev eldegi ónerkásipti damytý úshin qansha qarajat kerek ekenin aıtty.

Prezıdent Qasym-Jomart Toqaev Úkimettiń keńeıtilgen otyrysynda óńdeý ónerkásibiniń ósý úrdisin «bekitýdi» tapsyrǵan edi.

− Óńdeý ónerkásibin damytý úshin bıyl 1,5 trıllıon teńgege 190 joba engiziletin bolady. Oǵan qosa, jalpy quny 15,3 trıllıon teńge bolatyn 417 joba boıynsha jumys bastaldy. Bul jobalardy jeke ınvestıtsııalar, ekinshi deńgeıli bankter jáne damý ınstıtýttary esebinen qarjylandyrý kózdelgen, − dedi jańa mınıstr Úkimet otyrysynda.

Qazir 1,1 trln teńgeden astam somaǵa óńdeý ónerkásibi jobalaryn qarjylandyrý pysyqtalýda. Atap aıtqanda, Qazaqstan Damý banki boıynsha iri jobalardy iske asyrý úshin 183 mıllıardtan astam teńgege qajettilik bar.

− «Ónerkásipti damytý qory» boıynsha — orta jáne shaǵyn jobalardy iske asyrýǵa 800 mıllıard teńge qajet. Sonyń ishinde bıyl shaǵyn bıznestiń erekshe suranysyna ıe shaǵyn ónerkásiptik aımaqtardy qarjylandyrýǵa shamamen 100 mıllıard teńge qajet. Bul sharalar ónerkásiptiń ósýine, jańa jumys oryndaryn qurýǵa jáne ekonomıka salalarynyń damýyna múmkindik beredi, − deıdi Ersaıyn Naǵaspaev.

Sonymen birge, «Ónerkásipti damytý qory» arqyly qoǵamdyq kólik pen arnaıy tehnıkany jańartý úshin lızıngke shamamen 109 mıllıard teńge qajet.

− Nátıjesinde, aldaǵy eki jylda 900-ge jýyq jańa avtobýs, sondaı-aq shuǵyl jáne kommýnaldyq qyzmetterge arnalǵan 800-den astam arnaıy tehnıka jetkiziledi, − dedi Ónerkásip mınıstri.

Aıta keteıik, búgin Ónerkásip jáne qurylys mınıstri qyzmetine kirisken Ersaıyn Naǵaspaev Úkimet úıinde ant qabyldady.

Sondaı-aq, burynǵy mınıstr Qanat Sharlapaevtyń nesimen este qalǵanyna sholý usynylǵan edi.