Qoǵamdyq kólik, kógaldandyrý jáne abattandyrý: Astana aldaǵy 10 jylda qalaı ózgeredi
ASTANA. KAZINFORM – Astanada qala ákimi Jeńis Qasymbektiń, Indýstrııa jáne qurylys mınıstri Ersaıyn Naǵaspaevtyń, óńirlik ákimdikter men ýrbanıstıka salasyndaǵy halyqaralyq sarapshylardyń qatysýymen semınar-kezdesý ótti.
Jıynda elordanyń áleýmettik-ekonomıkalyq damý nátıjeleri saralanyp, 2035 jylǵa deıingi negizgi damý baǵyttary belgilendi, habarlaıdy elorda ákimdiginiń resmı saıty.
Іs-shara Memleket basshysynyń tapsyrmasy men «Taza Qazaqstan» atty iri ekologııalyq bastama aıasynda uıymdastyryldy.
Qala ákimi Jeńis Qasymbektiń aıtýynsha, Astana turǵyndarynyń sany 1,5 mıllıon adamǵa jetip, jyl saıyn shamamen 7 paıyzǵa ósip keledi. Osyǵan oraı qalanyń jańa Bas jospary qabyldandy. Onda halyq sany 2,3-2,5 mıllıon adamǵa deıin artady dep boljanǵan. Sondaı-aq, eski turǵyn úılerdi jańartý baǵdarlamasy talqylandy. 2030 jylǵa deıin 206 apatty úıdiń turǵyndary jańa baspanaǵa kóshiriledi. Qalanyń qurylys saıasaty áleýmettik ınfraqurylymdy damytýǵa, abattandyrýǵa jáne jasyl aımaqtar qurýǵa basymdyq beredi.
Qala ákiminiń aıtýynsha, barlyq jumys «adamdarǵa arnalǵan qala» qaǵıdatyna negizdelip otyr. ıAǵnı, basty nazar turǵyndardyń ómir súrý sapasyna, qoljetimdi ári yńǵaıly orta qalyptastyrýǵa aýdarylǵan. Injenerlik ınfraqurylym aldan ala josparlanyp, damý qarqyny turǵyndar qajettilikterinen ozyq júrýi tıis.
Astanada kólik júıesin damytý da basty baǵyttardyń biri sanalady. Qoǵamdyq kóliktiń úlesin qazirgi 41 paıyzdan 71 paıyzǵa deıin arttyrý kózdelip otyr. Bul rette avtobýs parki jańartylyp, jańa jolaıryqtar salynady. Sonymen qatar, LRT jobasyn iske asyrý jalǵasýda. Alǵashqy jeliniń synaq rejıminde iske qosylýy bıylǵy qyrkúıekke josparlanǵan.
Ekologııa jáne kógaldandyrý máselesi de erekshe nazarda. Sońǵy úsh jyl ishinde Astanada 2,5 mıllıonnan astam aǵash otyrǵyzyldy. Qalada kógaldandyrý erejeleri qabyldanyp, aǵashtardy tsıfrlandyrý júıesi engizildi. Qoǵamdyq keńistikter men kóshelerdi abattandyrý, jaǵalaýlardy kórkeıtý jumysy júrgizilýde. Kishi Taldykól aýmaǵynda ekopark salynyp jatyr, sondaı-aq Green Line jaıaý júrginshiler joly men Damu parki qolǵa alynǵan.
Elordada kreatıvti ındýstrııa men oqıǵaly týrızm de damyp keledi. Qalada halyqaralyq mádenı jáne sporttyq is-sharalar jıi ótedi. Bıyl Astanada álemdik juldyzdardyń kontsertteri de josparlanǵan.
Semınar sońynda qala ákimi Astananyń aldaǵy damýy qalalyq qyzmetterdiń tolyqtaı úılesimdi jumysy men halyqaralyq úzdik tájirıbelerdi engizýge baılanysty ekenin atap ótti.
Aıta keteıika, Astana – Býrabaı baǵytynda «Burabay Express» jańa elektrpoıyzy iske qosyldy.