Qoǵamdyq kólik ıeleri avtobýs ishine kamera ornatýǵa mindetteledi

ASTANA. KAZINFORM – Premer-mınıstr Oljas Bektenov Májilis depýtattarynyń saýalyna joldaǵan jaýapta qoǵamdyq kólik júrgizýshilerin oqys shabýyldardan qorǵaý sharalary týraly túsinikteme berdi. 

— Qazirgi tańda qoǵamdyq kólik júrgizýshilerin tolyqtaı oqshaýlaý máselesi qarastyrylyp jatqan joq. Óıtkeni ondaı tásilge qylmys deńgeıi joǵary elder júginedi. Onyń ústine kóptegen elde júrgizýshilerdiń densaýlyǵy qozǵalys kezinde nasharlaǵan jaǵdaıda der kezinde kómek berilýi úshin jumys keńistigi tolyq oqshaýlanbaıdy. Avtobýs ishinde kıkiljiń bolǵan jaǵdaıda júrgizýshi kólikti birden toqtatyp, polıtsııa shaqyrýy kerek. Jolaýshylar tasymaldaý erejesinde júrgizýshiniń nazaryn bólýge tyıym salynǵan, — deıdi Úkimet basshysy.

Úkimet qoǵamdyq kólikterge kamera ornatý talabyn zańmen bekitip almaq.

— Qazirgi tańda «Qazaqstan Respýblıkasynyń keıbir zańnamalyq aktilerine kóliktiń jańa túrleriniń qozǵalysyn retteý jáne jol qozǵalysy qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» zań jobasynyń aıasynda avtobýs ishindegi zań buzý faktilerin tirkeý úshin qoǵamdyq kólikterdi beınebaqylaý kameralarymen jabdyqtaý týraly normalar engizilmek, — dep jazylǵan jaýapta.

Buǵan deıin Almaty qalasynyń prokýratýrasy shaharda qoǵamdyq kólik júrgizýshilerine 1656 ret shabýyl jasalǵanyn málimdegen edi.