Qoǵamdyq qatynastardyń damýy azamattyq zańnamany qaıta qaraýdy talap etedi - sarapshy

ASTANA. KAZINFORM – Qazaqstanda jańa Azamattyq kodeksti ázirleý kezinde azamattyq zańnamanyń tujyrymdamalyq negizderin jańartyp, menshikke qol suǵylmaýshylyq, shart erkindigi jáne azamattardyń quqyqtaryn qorǵaý qaǵıdattaryn odan ári damytý qajet. Bul týraly QR Zańnama jáne quqyqtyq aqparat ınstıtýtynyń jetekshi ǵylymı qyzmetkeri, zań ǵylymdarynyń kandıdaty Áıgerim Dosanova málimdedi.

Eńbek
Foto: Pixabay.com

Memleket basshysy Qasym-Jomart Toqaev Qazaqstan halqyna arnaǵan Joldaýynda jańa Azamattyq kodeksti ázirleý jóninde bastama kótergen bolatyn.

Sarapshynyń pikirinshe, qazirgi qoǵamdyq jáne ekonomıkalyq qatynastardyń damý úrdisteri azamattyq zańnamany keshendi túrde qaıta qaraýdy jáne onyń quqyqtyq retteý tetikterin jetildirýdi talap etedi.

Jańa Kodeksti ázirleý barysynda jekelegen quqyqtyq normalardy jańartýmen ǵana shektelmeı, azamattyq-quqyqtyq retteýdiń irgeli qaǵıdattaryn odan ári damytýǵa basymdyq berilýi tıis.

Olardyń qatarynda azamattyq quqyq qatynastaryna qatysýshylardyń teńdigi, menshikke qol suǵylmaýshylyq, shart erkindigi, jeke isterge ozbyrlyqpen aralasýǵa jol bermeý jáne azamattyq quqyqtardy kedergisiz júzege asyrý qaǵıdattary bar.

– Atalǵan qaǵıdattar jeke quqyq júıesiniń negizin quraıdy jáne azamattyq-quqyqtyq ınstıtýttardyń mazmunyn aıqyndaıdy. Sonymen qatar olardyń is júzinde tıimdi iske asyrylýy zańnamalyq normalardyń ózara úılesimdiligi men quqyq qoldaný praktıkasynyń birizdiligin talap etedi. Osy turǵydan alǵanda, adaldyq, parasattylyq jáne ádildik qaǵıdattaryn odan ári damytý erekshe mańyzǵa ıe. Bul qaǵıdattar azamattyq aınalymǵa qatysýshylardyń minez-qulqyn baǵalaýda, mindettemelerdi oryndaýda jáne múliktik daýlardy sheshýde eleýli ról atqarady, – dedi Áıgerim Dosanova.

Onyń aıtýynsha, azamattyq zańnamanyń tıimdiligi tek quqyqtyq normalardyń mazmunyna ǵana emes, olardyń ózara úılesimdiligi men quqyq qoldaný tájirıbesinde birizdi júzege asyrylýyna da baılanysty.

Sondyqtan jańa Azamattyq kodeksti ázirleý kezinde jekelegen normalardyń qazirgi zaman talaptaryna sáıkestigin qamtamasyz etýmen qatar, azamattyq-quqyqtyq retteýdiń tutastyǵy men júıeliligine erekshe nazar aýdarý qajet.

Aıta keteıik, buǵan deıin jańa Azamattyq kodeksti ázirleý kezinde shart erkindigi men menshik quqyǵyn qorǵaýdy kúsheıtý máseleleri kóterilgen bolatyn.