Qoǵamdyq dıalog: Petropavlda jańa Konstıtýtsııany iske asyrýdaǵy óńirlerdiń róli talqylandy
PETROPAVL. KAZINFORM –«KISI GPS: Gylym. Pikir. Sayasat» ulttyq sarapshylyq alańynyń kezekti otyrysy Petropavlda ótti. Jıynda elimizde jańa Konstıtýtsııanyń júzege asyrylýy jáne ondaǵy óńirlerdiń róli keńinen talqylandy.
Іs-sharany Qazaqstan Respýblıkasynyń Prezıdenti janyndaǵy Qazaqstannyń strategııalyq zertteýler ınstıtýty uıymdastyrdy. Otyrysqa jetekshi sarapshylar, ǵylymı qaýymdastyq ókilderi, zańgerler, saıasattanýshylar, úkimettik emes uıymdardyń basshylary jáne óńirdiń Qoǵamdyq keńesiniń músheleri qatysty.
Jıynǵa qatystýshylar jańa Konstıtýtsııany óńirlerde júzege asyrýda jergilikti ózin-ózi basqarý men azamattyq qoǵamnyń rólin, qoǵamdyq dıalogty, saıası partııalardy jáne qoǵamdyq qatysýdyń jańa ınstıtýttaryn damytý máselelerin talqylady.
Qazaqstannyń strategııalyq zertteýler ınstıtýtynyń dırektory Jandos Shaımardanovtyń aıtýynsha, jańa Konstıtýtsııa - ádilettilik, zań ústemdigi, jaýapkershilik jáne barsha azamatqa teń múmkindik qaǵıdattaryna negizdelgen jańa memlekettik basqarý júıesin qalyptastyrýǵa negiz boldy.
Sondaı-aq ol jańa saıası júıede saıası partııalardyń jaýapkershiligi artyp, olardyń halyqpen tyǵyz baılanysta jumys isteýiniń mańyzy kúsheıgenin atap ótti. Buǵan qosa, Qazaqstan Halyq Keńesiniń qurylýy óńirlerdiń únin estýge jáne memleket pen qoǵam arasyndaǵy baılanysty nyǵaıtýǵa múmkindik beretinin jetkizdi.
Іs-sharada Soltústik Qazaqstan oblysynyń damý áleýeti de sóz boldy. Sarapshylar óńirdiń aýyl sharýashylyǵy, tsıfrlyq tehnologııalar, jasandy ıntellekt pen ınnovatsııalar salasynda úlken múmkindikterge ıe ekenin atap ótti.
Jergilikti ózin-ózi basqarýdy damytý ınstıtýtynyń dırektory Sergeı Hýdıakov Konstıtýtsııalyq reformalardyń nátıjesinde máslıhattardyń ókilettigi keńeıip, jergilikti bıýdjetterdi basqarý, qoǵamdyq baqylaý jáne halyqtyń sheshim qabyldaý protsesine qatysý múmkindikteri artqanyn aıtty.
Qoǵam belsendileri de óz pikirlerimen bólisti. «Assambleıa jastary» SQO jastar birlestiginiń tóraǵasy, oblystyq Qoǵamdyq keńes múshesi Darıǵa Smaıylova jastardyń qoǵamdyq-saıası ómirge belsendi aralasýy eldiń bolashaǵy úshin mańyzdy ekenin atap ótti.
Onyń aıtýynsha, saılaýǵa qatysý - ár azamattyń konstıtýtsııalyq quqyǵy ǵana emes, azamattyq jaýapkershiliginiń de kórinisi.
Al «SQO Azamattyq alıansy» qaýymdastyǵy tóraǵasynyń orynbasary Ásel Esjanova jańa saılaý júıesiniń erekshelikterine toqtaldy.
Onyń aıtýynsha, tolyq proportsıonaldy modelge kóshý saıası partııalardyń rólin kúsheıtip, olardyń baǵdarlamalyq básekelestigin arttyrady. Bul júıe boıynsha Quryltaıdyń barlyq 145 depýtaty partııalyq tizimder arqyly saılanady. Nátıjesinde partııalardyń jańarýyna jáne qoǵam aldyndaǵy jaýapkershiliginiń artýyna yqpal etedi.
«SQO Jastar máslıhaty» qoǵamdyq birlestiginiń ókili Tımýr Aljanovtyń pikirinshe, qazirgi saılaý naýqany qoǵamnyń saıası júıeni jańartýǵa degen suranysyna jaýap beredi. Partııalar basshylyq quramdaryn jańartyp, jas kóshbasshylardy tartyp, qoǵamǵa jańa ıdeıalar men baǵdarlamalar usynyp otyr.
Jıyn sońynda qatysýshylar jańa Konstıtýtsııanyń tıimdi júzege asýy óńirlerdiń belsendiligine, jergilikti ózin-ózi basqarý júıesiniń damýyna, azamattyq qoǵam ınstıtýttarynyń nyǵaıýyna jáne memleket pen qoǵam arasyndaǵy ashyq dıalogtyń jalǵasýyna tikeleı baılanysty degen ortaq pikirge keldi.
Buǵan deıin Qyzylordada «Konstıtýtsııa — azamattyq qoǵamdy damytýdyń quqyqtyq irgetasy» taqyrybynda oblystyq forým ótkenin jazǵan edik.
