Qoǵamdyq birlestik qurý rásimi jeńildetilip, jaýapkershilik kúsheıtiledi – Nartaı Sársenǵalıev
Aldaǵy sársenbide ótetin Májilistiń jalpy otyrysynda «Qoǵamdyq birlestikter týraly» Zańǵa ózgertýler men tolyqtyrýlar engizý» týraly zań jobasy 1-oqylymda talqyǵa túsedi. Osyǵan oraı atalǵan zań jobasy boıynsha jumys tobynyń tóraǵasy Májilis depýtaty Nartaı Sársenǵalıevten usynylyp otyrǵan jańa normalar jaıynda surap bilgen edik, dep habarlaıdy Kazinform.
«Ózderińiz biletindeı, respýblıkanyń aýmaqtyq qurylymy ózgerip, 3 oblys ortalyǵy quryldy. Osyǵan oraı qazirgi qoldanystaǵy «Qoǵamdyq birlestikter týraly» Zańdy retteý qajettiligi týyndap otyr. Osyny retteýdi kózdedik. Alaıda, eń basty novella birlestik qurýǵa qatysty ózgeris bolmaq. Buryn bizde qoǵamdyq birlestik qurý úshin 10 quryltaıshy qajet edi. Endi zań jobasyna sáıkes, elimizde qoǵamdyq birlestik qurý úshin 3 quryltaıshy jetkilikti bolady. Taǵy bir ózgeris – osy ýaqytqa deıin bizde qoǵamdyq birlestikter ashylyp, jabylyp jatady. Al endigi ýaqytta birlestiktiń qarjylyq negizdemesi bolsa, onda memlekettik organdar ony jabylǵanǵa deıin tekseredi. Bul jaýapkershilikti kúsheıtedi», - dedi Nartaı Sársenǵalıev.
Depýtat zań jobasyn ázirleý barysynda eýropalyq tájirıbe tyńǵylyqty zerdelengenin aıtady.
«Kásipodaqtar, dinı birlestikter, saıası partııalarǵa qatysty saýaldar da kelip túsýde, bul óte mańyzdy. Saıası partııalarǵa, dinı birlestikterge, kásipodaqtarǵa bul zańda kózdelgen jeńildikter júrmeıdi. Dinı uıymdar da, saıası partııalar da, kásipodaqtar da ózderiniń salalyq zańnamasymen retteledi. Usynylyp otyrǵan zań jobasyna súıenip kásipodaq, dinı birlestik nemese saıası partııa qurýǵa ruqsat berilmeıdi. Bul zań jobasy aldaǵy sársenbide 1-oqylymǵa shyǵarylady», - dedi Májilis depýtaty.
Depýtat zań jobasy boıynsha Májilistiń barlyq komıteti oń qorytyndy bergenin, depýtattar tarapynan qarsylyq bolmaǵanyn atap ótedi.
«Eń bastysy – qoǵamdy demokratııalandyrý, azamattarymyzǵa barynsha kóp qoǵamdyq birlestik qurýǵa múmkindik berý. Jumys tobynda quryltaıshy sany azaıtylyp, birlestik kóbeıse «memlekettik organdarǵa salmaq bolady» degen pikirler boldy. Biraq, oǵan qarap otyra almaımyz ǵoı. Óıtkeni, «demokratııalyq qoǵam, estýshi memleket quramyz» dep azamattarǵa jeke múmkindik bersek, endi olarǵa birlestik qurýǵa da jol ashýymyz qajet. Túrli máseleler boıynsha ustanymyn bildirip, qoǵamdyq birlestik qurǵysy kele me azamattarymyz, onda eshqandaı másele bolmaýy tıis. 3 quryltaıshy taýyp, qursyn. Ary qaraı qansha múshesi bolatyndyǵy olardyń belsendiligine, jumystaryna baılanysty. Bastysy quryltaıshylar sanyn 10-nan 3-ke túsirip bermekpiz», - dedi Nartaı Aralbaıuly.
