Qoǵamdy ózgertý jáne demokratııa qaǵıdattaryn engizý jolynan aınymaımyz - Prezıdent

Elimiz óktemdik pen óshpendilikke, qoǵamdyq tártipti aıaq asty etýge, zorlyq-zombylyqqa shaqyrýǵa, azamattardyń ar-namysyn taptaıtyn áreketter jasaýǵa jol bermeıdi.

Bul týraly Aqordada Respýblıka kúnine oraı birqatar azamatqa memlekettik nagradalar men syılyqtar tapsyrýǵa arnalǵan saltanatty rásimde Memleket basshysy Qasym-Jomart Toqaev aıtty, dep habarlaıdy Kazinform.

«Memlekettilik tuǵyryn nyǵaıta túsý úshin zań ústemdigin ornyqtyrý óte mańyzdy. Tártipke baǵynǵan qoǵam órkenıetti bolady. Bul – zańdylyq. Ár azamat elimizdiń zańyn qurmettese, bereke-birlik te, baqýatty turmys ta bolady. Ádiletti Qazaqstandy qurý úshin quqyqtyq mádenıetti damytý qajet. Zańsyzdyq, tártipsizdik, mádenıetsizdik eldi jarǵa jyǵady. Mundaı jaǵymsyz úrdisterge búkil qoǵam bolyp qarsy turýymyz kerek. Osyny sanaǵa myqtap sińirgen jón. Biz birtindep qoǵamdy ózgertý jáne demokratııa qaǵıdattaryn engizý jolynan aınymaımyz», - dedi Qasym-Jomart Toqaev.

Prezıdent álemde saıası jáne ekonomıkalyq ahýal qubylyp turǵan zamanda zań jáne quqyq ústemdigin qamtamasyz etý óte mańyzdy ekendigin basa aıtty.

«Memleket radıkalızmniń, ekstremızmniń, quqyqtyq nıgılızmniń jáne turmystyq vandalızmniń kez kelgen kórinisine múldem tózbeýshilik saıasatyn ustanatyn bolady. Elimiz óktemdik pen óshpendilikke, qoǵamdyq tártipti aıaq asty etýge, zorlyq-zombylyqqa shaqyrýǵa, azamattardyń ar-namysyn taptaıtyn áreketter jasaýǵa jol bermeıdi. Zańǵa qaıshy keletin, azamattardyń arasyna iritki salatyn jáne turaqtylyqqa syna qaǵatyn kez kelgen sóz ben áreketke qatań tosqaýyl qoıady. Bul talapqa baǵynbaý memleketke de, qoǵamǵa da qarsy shyǵý dep baǵalanady. Muny bárin, ásirese, el aldynda júrgen jáne halyqqa sózi ótimdi azamattar tereń túsinýi kerek», - dedi Memleket basshysy.