Qoǵamdaǵy rezonans: Múftııat ýaǵyzshy Qurbanáli Ahmetke qatysty málimdeme jasady
ASTANA.KAZINFORM — Qazaqstan musylmandary dinı basqarmasy sońǵy ýaqytta qoǵamda talqylanyp júrgen Qurbanáli Ahmetke qatysty daýly máselege resmı jaýap berdi.
Eske sala keteıik, jýrnalıst Janar Baısemizdiń «Baısemiz LIVE» jobasyndaǵy suqbatynan keıin áleýmettik jelide úlken rezonans týdyrǵan «psevdoımam» Qurbanáli Ahmetke qatysty Qazaqstan musylmandary dinı basqarmasy túsinikteme berdi.
— Qurbanáli Ahmet Qazaqstan musylmandary dinı basqarmasynyń qurylymynda qyzmet etpeıdi, Dinı basqarmamen eshqandaı qyzmettik nemese resmı baılanysy joq. Osyǵan baılanysty onyń tarapynan aıtylǵan pikirler, jeke kózqarastar men málimdemeler QMDB-nyń resmı ustanymy bolyp tabylmaıtyndyǵyn habarlaımyz. Qazaqstan musylmandary dinı basqarmasy dinge qatysty máselelerde tek resmı aqparat kózderine súıenýge shaqyrady. Qoǵam arasynda túrli túsinbeýshilik pen jalǵan aqparattyń taralýyna jol bermeý — barshamyzǵa ortaq jaýapkershilik, — delingen múftııattyń jaýabynda.
QMDB sondaı-aq elimizdegi dinı turaqtylyqty saqtaý, qoǵam birligin nyǵaıtý jáne dástúrli qundylyqtardy nasıhattaý baǵytyndaǵy jumystaryn júıeli túrde jalǵastyra beretinin aıtqan.
Buǵan deıin Májilis depýtaty Ermurat Bapı teris dinı aǵymdarǵa tosqaýyl qoıý máselesin kóterip, QR Bas prokýrory Berik Asylovtyń atyna saýal joldaǵanyn eske salamyz.
— Búgin men bir jaǵynan azamattardyń jeke máselesi sııaqty kórinse de, qoǵamdyq turaqtylyq tuǵyryn teńseltip, ulttyq mádenı biregeılik pen elimizdiń aqparattyq qaýipsizdigine qaýip tóndirer qaterler tóńiregindegi taqyrypty qozǵamaqpyn. Sóz názik dinı dúnıeni jalbaǵaı jamylyp, eldiń ınternet áleminde halyqtyń sanasyna manıpýlıatsııa jasaıtyn «psevdodinı avtorıtetter» týrasynda bolmaq. Týrasyn qaımyqpaı aıtqanda, dúmshe dogmany tyqpalaǵan bul qarabaıyr dindarlar bizdiń ulttyq ustanymdy iritip, memleketimiz ben qoǵamnyń taǵanyn teńseltýde, — degen edi E. Bapı Májilisiniń jalpy otyrysynda.
Osy oraıda depýtat ulttyq máseleni popýlızm jolynda qurban etýge qushtar jýrnalıst áriptester men mass-medıanyń basqa da ókilderin kásibı, adamı jáne azamattyq ustanymǵa berik bolýǵa shaqyrǵan bolatyn.
Al áleýmettik jelide rezonans týdyrǵan suhbatta Qurbanáli Ahmet ekinshi áıelin jas shákirtine berip, úılendirgenin aıtqan bolatyn.
Artynsha ózin «ımam» retinde tanystyrǵan Qurbanáli Ahmet ákimshilik quqyq buzýshylyq týraly kodekstiń 490-baby boıynsha jaýapkershilikke tartylyp, aıyppul salynǵany málim boldy. Onyń málimdemeleri zańǵa qaıshy dep tanyldy.
