Qoǵamda jańa Konstıtýtsııa jobasynyń utymdy tustary aıtylyp jatyr — Erlan Qarın

ASTANA. KAZINFORM — Búgin Konstıtýtsııalyq reforma jónindegi komıssııanyń otyrysynda Memlekettik keńesshi Erlan Qarın qoǵamda aıtylyp jatqan usynysqa qatysty pikir bildirdi. 

— Jarty jylǵa jýyq ýaqyt ishinde azamattar men sarapshylardyń, túrli uıymdardyń usynystary men bastamalary negizinde ázirlengen jáne Konstıtýtsııalyq komıssııanyń ashyq ári tıimdi jumysynyń nátıjesinde jazylǵan jańa Konstıtýtsııanyń mátini ótken aptada jarııalandy. Qoǵamdyq talqylaý bastaldy. Qoǵamda jańa Konstıtýtsııanyń jobasyna úlken qyzyǵýshylyq bar ekeni baıqaldy. Azamattardyń kóbi, sarapshylar, kásibı mamandar, túrli qoǵamdyq jáne saıası uıymdardyń ókilderi, el turǵyndary 1995 jylǵy qabyldanǵan Ata Zańmen salystyra kele, jańa Konstıtýtsııanyń utymdy tustary men artyqshylyqtary kóp ekenin aıtyp jatyr, — dedi Erlan Qarın.

Onyń sózine qaraǵanda, qoǵamda jańa Konstıtýtsııada adam quqyqtary men bostandyǵyna basymdyq berilgeni, bilim men ǵylymnyń, mádenıet pen ınnovatsııanyń ortalyq ıdeıa retinde aıqyndalǵany, sondaı-aq Egemendik pen Táýelsizdik qundylyqtary aıqyn kórsetilgeni atap ótildi.

— Jalpy, qujatta kóptegen másele qamtylǵany aıtyldy. Sonymen qatar, basqa da usynystar jáne syn men pikirler, eskertpeler de aıtylyp jatyr. Ashyq talqylaý bolǵannan keıin, osylaı bolýy oryndy. Jańa mátindi sol úshin jurtshylyqtyń nazaryna usynyp otyrmyz, — dedi Memlekettik keńesshi.

Budan buryn habarlanǵandaı, búgin Konstıtýtsııalyq reformalar jónindegi komıssııanyń otyrysynda Erlan Qarın jańa preambýlada memlekettik shekarasy men aýmaqtyq tutastyǵyna qol suǵylmaıtyny anyq jazylǵanyn aıtty.