Qoǵamda zań men tártip ıdeologııasyn ilgeriletý jónindegi tujyrymdama bekitildi
ASTANA. KAZINFORM — Elimizde Qoǵamda zań jáne tártip ıdeologııasyn ilgeriletý jónindegi 2025-2030 jyldarǵa arnalǵan tujyrymdama bekitildi. Tıisti qaýlyny Úkimet qabyldady.
Qujat qoǵamda quqyqtyq mádenıet deńgeıin nyǵaıtýǵa jáne azamattardyń zańdardy saqtaý mańyzdylyǵyn túsinýine baǵyttalǵan.
Atap aıtqanda, Tujyrymdama qoǵamdaǵy quqyqtyq mádenıettiń qazirgi jaǵdaıyn taldaýǵa negizdelgen zań men tártip ıdeologııasyn ilgeriletý kózqarasyn aıqyndaıdy. Tujyrymdamany ázirleý barysynda halyqaralyq tájirıbe de eskerildi.
Qujat quqyqtyq tártipti saqtaýǵa, sybaılas jemqorlyq pen «kóleńkeli» áreketterge teris kózqaras qalyptastyrýǵa belsendi azamattyq qatysýdy kózdeıdi.
Búginde elimizde «Halyq únine qulaq asatyn memleket» tujyrymdamasynyń negizgi elementi sanalatyn zań men tártip qaǵıdattaryn nyǵaıtýǵa baǵyttalǵan reformalar belsendi túrde júrgizilýde. Atalǵan jumys ári qaraı da jalǵasyn tabady.
— Tujyrymdamanyń negizgi baǵyttaryn júzege asyrý nátıjesinde qoǵamda zańnyń ústemdigi týraly habardar etý deńgeıin arttyrý kózdelip otyr. Atalǵan jumys sheńberinde zańnamany odan ári jetildirý isi jalǵasady. Qujat azamattardyń quqyqtyq saýattylyǵyn arttyrýǵa jáne sot tóreligine qoljetimdilikti ári qaraı da qamtamasyz etýge baǵyttalǵan is-sharalardy iske asyrýdy kózdeıdi. Azamattardyń quqyqtyq saýatyn arttyrý jáne osy bilimin tájirıbede qoldaný maqsatynda oqytý is-sharalaryn uıymdastyrý josparlanyp otyr. Atap aıtqanda, stýdentterge quqyqtyq bilim berý tájirıbesin engizý naqty jaǵdaılarda quqyqtyq bilimdi tıimdi qoldaný qabiletin damytýǵa baǵyttalǵan oqytýdyń túrli formalaryna belsendi qatysýdy qamtıdy, — delingen Úkimet habarlamasynda.
Quqyq buzýdyń aldyn alýǵa jáne halyqqa qyzmet etýge; memleket pen qoǵam yntymaqtastyǵynyń jańa quraldaryn engizýge basa nazar aýdara otyryp, memlekettik organdar ashyqtyǵy mádenıetin qalyptastyrýǵa, azamattar úshin zamanaýı tsıfrlyq qyzmetterdi iske qosýǵa, atap aıtqanda, eGOV ashyq derekteriniń elektrondy úkimet fýnktsıonaldyǵyn damytýǵa, satyp alýlarǵa qoǵamdyq monıtorıng júrgizýge baǵyttalǵan jáne basqa da memlekettik jáne quqyq qorǵaý organdary qyzmetiniń servıstik modeli tıimdiligin arttyrý jónindegi sharalar kózdeledi. Bul jumysty atqarýǵa NQA belsendi túrde qatysady.
Sonymen qatar kadr saıasatyn reformalaý, polıtsııa qyzmetkerlerin biliktilikti arttyrý kýrstary, oqý-ádistemelik jıyndardy ótkizý arqyly daıarlaý, merıtokratııa qaǵıdatyn nyǵaıtý, «soft skills» damytý, sondaı-aq materıaldyq-tehnıkalyq jaraqtandyrýdy jańǵyrtý jalǵastyrylady.
— Aýqymdy derekterdi óńdeý úshin jasandy ıntellektini paıdalana otyryp, ІІM sıtýatsııalyq-taldaý ortalyǵynyń fýnktsııalaryn keńeıtý kózdeledi: kameralardan túsetin beıneaǵyn (bet álpet pen nómirdi taný), áleýmettik jeliler (qaýip-qaterdi baqylaý), qylmystyq statıstıka (qylmys oshaqtaryn boljaý); jedel qyzmetterdi, dáleldemelerdi avtomatty túrde salystyrý jáne tergeýshilerdiń sheshim qabyldaýyn qoldaý baǵdarlamalarymen jabdyqtaý, sondaı-aq tergeýshilerdi JI quraldarymen, tergeýdiń jańa taktıkalarymen (profaılıng, jaýap alý ádisteri, tsıfrlyq krımınalıstıka) jumys isteýge oqytý. Kórshi memlekettermen birlesip, transulttyq qylmysqa qarsy kúresti uıymdastyrý jáne aqparat almasý josparlanyp otyr, — delingen habarlamada.
Keshendi sharalar qabyldaý nátıjesinde qoǵamda zańdylyq pen quqyqtyq tártipti saqtaýda oń ózgeris qalyptasyp, zańdarǵa ústirt qaraýdan jaýapty ári sanaly kózqarasqa aýysady dep kútilýde. Qoǵamdaǵy árbir azamat basqa adamdardyń quqyqtaryn qurmettep qana qoımaı, quqyqtyq tártipti belsendi túrde saqtaıdy, bul jalpy tártiptiń jaqsarýyna ákeledi.
Budan bólek, qabyldanǵan sharalar nátıjesinde halyqtyń memlekettik jáne quqyq qorǵaý organdaryna degen senimin nyǵaıtady dep kútilýde. Jalpy, munyń bári quqyq buzýshylyqtar sanynyń tómendeýine, azamattarǵa qyzmet kórsetý sapasynyń jaqsarýyna, ekonomıkalyq tartymdylyq pen ınvestıtsııalyq ortanyń jaqsarýyna ákelýi tıis.
Aıta ketelik Bas prokýror jasóspirimder arasyndaǵy qylmysty aldyn alýdyń tıimdi jolyn ataǵan edi.