Qoǵamda memlekettik tilge degen suranysty arttyrý kerek - Dos Kóshim

ShYMKENT. QazAqparat - Búgin Óńirlik kommýnıkatsııalar qyzmetinde Túrkistan oblysynda ótetin «Qazaqstannyń bolashaǵy - qazaq tilinde» atty semınarǵa baılanysty baspasóz jıyny ótti. Onda Qazaqstan halqy Assambleıasy ǵylymı-saraptama keńesiniń múshesi, saıasatker Dos Kóshim memlekettik tildiń mártebesi jaıynda sóz qozǵady, dep habarlaıdy QazAqparat tilshisi.

Dos Kóshimniń pikirinshe, memlekettik tildiń mártebesin kóterý úshin qoǵamnyń osy máselege kelgende belsendiligi joǵary bolýy tıis.

«Keńes úkimetiniń shekpeninen bosap shyqqan elderdiń arasynda memlekettik tildiń mártebesin kóterý jaǵynan kemshin tustarymyzdyń bary jasyryn emes. Bul olqylyqtyń ornyn toltyrý úshin qoǵam bolyp atsalysý kerek. ıAǵnı, memleket tarapynan qazaq tiline jasalyp otyrǵan jaǵdaıdy durys paıdalanýymyz. Sońǵy kezderi qoǵamda jıi aıtylyp júrgen máseleniń biri memlekettik tildi kóterý. Áleýmettik jelilerde, jıyndarda túrli usynystar men pikirler aıtylyp jatady. Biraq, is júzine kelgende eshkim ony oryndap jatqan joq. Meniń aıtqym kelgeni qoǵamda memlekettik tilge degen suranysty arttyrý kerek. Azamattar tarapynan qajettilik bolmasa, bul másele sol kúıi qala bermek», - dedi Dos Kóshim.

Sondaı-aq, jıynda qazaq tilin latyn qarpine kóshirý jaıy da sóz boldy. Jyldyń sońyna qaraı latyn áripterine yńǵaılastyrylǵan jańa álipbı qabyldanatynyn aıtqan brıfıngke qatysýshylar osy máselege de beıjaı qaramaý kerek ekenin jetkizdi. Ǵalymdarmen ótken jıyndarda usynystardy ortaǵa salyp, belsendilik tanytý kerektigi aıtyldy.

Jıyn sońynda 2018 jyldyń 15-17 qazan kúnderi Túrkistan, Kentaý, Arys, Shymkent qalalarynda «Qazaqstannyń bolashaǵy - qazaq tilinde» atty respýblıkalyq semınardyń ótetindigi belgili boldy.