Qoǵamda konstıtýtsııalyq ózgeristerge qyzyǵýshylyq baıqalady - Erlan Qarın
«Búgin - referendým-2022 úgit naýqanynyń sońǵy kúni. Erteń tynyshtyq, al odan arǵy kún konstıtýtsııalyq reformalarǵa daýys berý kúni. Úgit naýqany óte belsendi, qarqyndy júrgenin atap ótkim keledi. Qoǵamda konstıtýtsııalyq ózgeristerge, jalpy saıası reformalarǵa barynsha joǵary qyzyǵýshylyq baıqalady. Ulttyq keńestegi áriptesterimmen birge konstıtýtsııalyq reformalardy túsindirýge qatystyq. Atap aıtqanda, Qyzylorda, Soltústik Qazaqstan oblystary, Almaty qalasy syndy óńirlerge bardyq. Ol jerlerde óńirlik qoǵamdyq keńestermen, shyǵarmashylyq jáne ǵylymı zııatkerlermen, jastarmen túrli formatta kezdesý ótkizdik. Jasyna, isteıtin qyzmetine, turǵylyqty jerine qaramastan qazaqstandyqtar eldegi oryn alyp jatqan ózgeristerge úlken nazar aýdaratyndyǵyn atap ótken jón. Jáne de azamattardyń basym bóligi prezıdenttik saıası jańǵyrý baǵdarlamasyn, jalpy Konstıtýtsııadaǵy ózgeristerdi qoldaıdy», dep jazdy Erlan Qarın Telegram paraqshasynda.
Sonymen qatar ol Ulttyq qoǵamdyq senim keńesiniń múshelerimen birge konstıtýtsııalyq reformalardyýń negizgi erejelerin túrli sarapshylyq alańdarda, BAQ betinde talqyǵa salǵandaryn atap ótedi. Mysal retinde, A.Baıtasov pen M.Ábenovtiń YouTube-arnalaryn alǵa tartady.
«Áleýmettik jelilerde ádistemelik kómek retinde Konstıtýtsııadaǵy túzetýlerdiń negizgi baǵyttaryn túsindirýge arnalǵan eki rolık jarııalandy. Kópshilik atap ótkendeı, úgit jappaı myńdaǵan «alǵa-forýmsyz» ótti. Barlyq naýqan qoǵamdyq suhbat, áńgimelesý jáne talqylaý formatynda boldy. Bul Jańa Qazaqstannyń jańa saıası mádenıetin qalyptastyrýdaǵy alǵashqy qadam», - dedi Memlekettik hatshy.
