Qoǵamda kásibı-tehnıkalyq bilim berý júıesi ekinshi surypty degen qate túsinik qalyptasqan - Vıtse-premer
ANA. 29 sáýir. QazAqparat /Jasulan Amanbaıuly/ - Astanada Qazaqstandaǵy kásibı-tehnıkalyq bilim berý júıesiniń bedelin joǵarylatý máselesi kóterildi.
QR Premer-Mınıstrdiń orynbasary Erbol Orynbaev búgin Astanada «Eńbek naryǵy jáne kásibı jáne tehnıkalyq bilim berýdi damytýdyń bolashaǵy» taqyrybynda ótken respýblıkalyq konferentsııa barysynda, óz baıandamasynda bul máseleni túbegeıli sheshý qajettigin atap kórsetti. Onyń aıtýynsha, qoǵamda kásibı-tehnıkalyq bilim berý salasynyń bedeli tómen.
«Qoǵamda kásibı-tehnıkalyq bilim berý júıesi ekinshi surypty degen qate túsinik qalyptasqan»,-deıdi E.Orynbaev.
Bul óz kezeginde eńbek naryǵynda tepe-teńdiktiń saqtalmaýyna ákep soǵýda. Kásibı-tehnıkalyq bilim berý uıymdaryna jylyna 300 myńnan astam adam túsedi. Joǵary oqý oryndaryna da osynsha adam barady. Qazaqstandaǵy jumyspen qamtylǵandardyń 27 paıyzynda kásibı-tehnıkalyq bilimderi bar, 28 paıyzy joǵary oqý oryndaryn támamdaǵan. Al 45 paıyzǵa jýyǵy orta mektepten keıin bilimderin jalǵastyrmaǵan.
E.Orynbaevtiń atap kórsetkenindeı, «bizdiń JOO-daǵy stýdentterdiń sany kolledjder men lıtseılerdegi stýdentterge qaraǵanda kóp. Bul másele úlken alańdaýshylyq týdyrady».
Onyń aıtýynsha, basqa damyǵan memleketterde kásibı-tehnıkalyq bilim alyp shyqqandardyń sany 75 paıyzdy quraıdy.
«Biz zamanaýı tehnologııalarǵa qurylǵan, ınnovatsııadan joǵary ónimdilikke baǵyttalǵan jańa ekonomıkanyń negizin qalap jatyrmyz. Ótken jyly Údemeli ındýstrııalyq-ınnovatsııalyq damý baǵdarlamasy jasaldy. Jaqyn jyldary sapaly jumys oryndary paıda bola bastaıdy, oǵan birinshi kezekte otandyq mamandar tartylýy tıis. Bizdiń basty maqsatymyz barlyq qazaqstandyqtarǵa qazirgi zamanǵa saı kásibı bilim alýlaryna jaǵdaı jasaý bolyp tabylady. Óz kezeginde jastar, mektep túlekteri joǵary oqý oryndaryna túsýge nemese ókinishke oraı, múldem bilimderin jalǵastyrmaýdy sheshedi»,-dedi vıtse-premer.
