Qoǵamda beıbit mıtıng ótkizý mádenıeti qalyptaspaǵan – Bas prokýror

ASTANA. QazAqparat – QR Bas prokýrory Berik Asylov Májiliste qańtar oqıǵasyndaǵy eń qaýipti jaǵdaı Almaty qalasynda bolǵanyn aıtty, dep habarlaıdy QazAqparat tilshisi.

«Qoǵamda beıbit mıtıng ótkizý mádenıeti qalyptaspaǵanyn moıyndaýymyz kerek. Adamdar jınalyp, kóshege shyqqan kezde beıbit Mıtıngter týraly zańnyń barlyq normalaryn buzdy. Uıymdastyrýshylar ákimdikti habardar etpeı, myńdaǵan adamdy jınady. Vatsap pen Telegram arqyly tártipsizdikke qatysýshylardyń jınalýyn jáne qozǵalysyn úılestirgen», - dedi Berik Asylov Májilistiń búgingi otyrysynda.

Almatyda sanaýly saǵattar ishinde bir topta qatysýshylar sany 5 jarym myńǵa deıin kóbeıdi. Sol sııaqty, Jambyl oblysynda chatta qatysýshylar sany 4 myńǵa deıin ósti.

«Keıin «tobyr áseri» oryn alyp, adamdar polıtsııanyń zańdy talabyn oryndamaı, qarsylyq kórsetti. Órtep, tonady jáne kúsh qoldana bastady. Bul degenimiz – naǵyz qylmys. Bul úshin Almatyǵa arnaıy kórshi oblystardan adamdar kelgen. Keıin jaǵdaı odan ári ýshyǵa tústi. Tek bir kúnde – 5 qańtarda 8 óńirde ákimdikterge shabýyl jasaldy. «Anna», «Qorǵan» jáne «Alpamys» ańshylyq dúkenderi tonaldy. Keıin olar qarý-jaraqty mashınamen alańǵa jetkizip, mıtıngke qatysýshylarǵa tarata bastady», - dedi Bas prokýror.

Sonymen birge, Almatynyń Polıtsııa departamenti men bólimderine shabýyl jasaldy. Olardyń maqsaty qarý-jaraq bólmeleri boldy.

«Saǵat 18.00-de Taldyqorǵan men Aqtóbede oblys ákimdikterin, Semeı qalasy ákimdigin basyp aldy. Túnde, birneshe ret jasalǵan shabýyldan keıin Jambyl oblysy ákimdigine zańsyz kirdi. Odan bólek, 5 qańtar kúni keshke, Almaty men Aqtóbe halyqaralyq áýejaılaryn bir ýaqytta basyp aldy. ıAǵnı, eń qaýipti jaǵdaı ońtústik astanada oryn aldy», - dedi Berik Asylov.