Qoǵam jańa formattaǵy parlamentti talap etip otyr - qyrǵyzstandyq sarapshy

ASTANA. KAZINFORM — Qyrkúıek aıynyń basynda Jogorký Keneshtiń bir top depýtaty parlamenttiń ózdiginen taraýyn jáne keıinnen kezekten tys saılaý ótkizýdi qoldady. Bul bastamaǵa qatysty pikirin Evrazııa strategııalyq zertteýler ortalyǵynyń dırektory, qyrǵyz saıasattanýshysy Baqytbek Jumaǵulov Kazinform tilshisine bergen suhbatynda bildirdi.

Saıasattanýshynyń aıtýynsha, Qyrǵyzstanda Jogorký Kenesh saılaýy 2026 jylǵy qarashaǵa josparlanǵan, alaıda bul kezeń prezıdenttik saılaýǵa daıyndyq ýaqytymen qabattasady.

«Saıası turaqtylyqty saqtaý úshin eki saılaý naýqanyn bólip ótkizý usynyldy. 32 depýtat kezekten tys saılaýdy jaqtap otyr. Onyń negizi — parlamenttiń ózin-ózi taratýy. Bul tetik qazir pysyqtalyp jatyr. Shamasy, sheshim 25 qyrkúıekte qabyldanýy múmkin. Osydan keıin bes kún ishinde prezıdent kezekten tys saılaýdy taǵaıyndaýy tıis. Eger memleket basshysy taǵaıyndamasa, onda Ortalyq saılaý komıssııasy derbes túrde saılaý uıymdastyrýǵa kirisedi», — dedi Jumaǵulov.

Onyń sózinshe, qyrǵyz qoǵamy jańa depýtattardy kútýde.

«Bul mindetti túrde bolady, sebebi kezekten tys parlamenttik saılaý jańa saılaý júıesi boıynsha ótedi. Bul júıede saıası partııalardyń róli azaıady. Negizgi nazar 30 kópmandatty aýmaqtyq okrýgke aýdarylady, árqaısysynan úsh depýtat saılanady, olardyń biri mindetti túrde áıel bolýy tıis.

Kandıdattardyń basym bóligi — ózin-ózi usynǵandar. Sonymen qatar jergilikti atqarýshy organdardy reformalaý máselesi talqylanýda: ortalyq bıliktiń oblystyq ókili ınstıtýty taratylyp, okrýgterdegi ákimderdiń róli kúsheıtiledi», — dep túıindedi sarapshy.

Eske sala keteıik, maýsym aıynda Qyrǵyzstanda Jogorký Kenesh depýtattaryn saılaý tártibin ózgertken konstıtýtsııalyq zań qabyldanǵan bolatyn.

Buǵan deıin Kazinform parlamenttiń ózin-ózi taratýynyń sebepteri men saldary týraly jazǵan edi.