Qoǵam Úkimettiń jumysyna joǵary talap qoıady — Prezıdent
ASTANA. KAZINFORM — Memleket basshysy Qasym-Jomart Toqaev «Ana tili» gazetine bergen suhbatynda Mınıstrler kabınetiniń jumysyn qalaı baǵalaıtynyn aıtyp berdi.
— Siz byltyrǵy suhbatyńyzda «Derbestikke jáne qosymsha ókilettikke ıe bolýǵa umtylǵan Úkimet qalaǵanyn aldy. Biraq „almaqtyń da salmaǵy bar“, olar ózderine qoıylatyn talap ta kúsheıetinin túsinýge tıis» degen edińiz. Úkimettiń jańa quramy jasaqtalǵanyna, mine, 11 aı ótti. Menińshe, bul — belgili bir paıym jasaýǵa jetkilikti merzim. Mınıstrler kabınetiniń jumysyna kóńilińiz tola ma?
— Úkimettiń mindeti — ekonomıkanyń ósimin qamtamasyz etý jáne azamattardyń ál-aýqatyn jaqsartý. Jalpy alǵanda, Mınıstrler kabıneti bul mindetin oryndap otyr. Ekonomıkany ártaraptandyrý, óńdeý ónerkásibin damytý, ınfraqurylymdy jańǵyrtý sııaqty baǵyttar boıynsha byltyr atqarylǵan jumystyń nátıjeleri jaman emes. Alaıda bári minsiz deýge kelmeıdi, problemalar da bar.
Men mınıstrlerden neǵurlym tıimdi jumys isteýdi jáne sheshim qabyldaǵanda batyl bolýdy únemi talap etemin. Qoǵam da Úkimettiń jumysyna joǵary talap qoıady. Bul — óte oryndy ári qalypty jaǵdaı. Sondyqtan Úkimettiń jumysy naqty nátıjege oraı, ádil baǵalanady. Basty kórsetkish — azamattardyń turmys sapasy. Ekonomıkadaǵy jetistikter adamdardyń kúndelikti ómirine oń áserin tıgizbese, ony ánsheıin sóz júzindegi jetistik deýge bolady.
Jýyq arada Úkimettiń keńeıtilgen otyrysy ótedi. Sol kezde jyldy qorytyndylap, qazirgi máselelerdi talqylap, jańa josparlar jasaımyz. Qazaqstanǵa ekonomıkanyń 4 paıyzdyq ósimi azdyq etetini anyq. Bul týraly shetel ókilderine de aıtyp júrmin. Úkimet ekonomıkany barynsha damytý úshin tyń tásilder tabýǵa tıis.