Qoǵam tótenshe jaǵdaılardan saqtandyrý máselesin shapshań eńserýi kerek - V. Bojko
ASTANA. 21 mamyr. QazAqparat - Tótenshe jaǵdaılardan saqtandyrý máselesin bizdiń qoǵam shapshań eńserýi kerek.
Búgin QR Parlamenti Májilisinde ótken Úkimet saǵatynda Tótenshe jaǵdaılar mınıstri Vladımır Bojko osylaı málim etti.
«Qoldanystaǵy turǵyn úı qatynastary týraly zańnamaǵa sáıkes, jergilikti atqarýshy organdar tótenshe jaǵdaılardan japa shekkenderge bıýdjet qarajaty esebinen salynǵan turǵyn úılerdi óteýsiz negizde berýge quqylary joq. Bundaı quqyqtyq olqylyqtardy joıý úshin azamattyq qorǵanys týraly zańnamaǵa ózgerister engizýdi qarastyryp jatyrmyz», - deıdi mınıstr.
Bul rette vedomstvo basshysy tótenshe jaǵdaılar táýekelderine qatysty álemdik tájirıbelerde keńinen qoldanylatyn saqtandyrý kompanııalarynyń qyzmeti zerdelenýi tıistigin atap ótti.
«Zilzalalar, tabıǵı apattardan saqtandyratyn otandyq saqtandyrý júıesiniń damymaýy saldarynan álgindeı tilsiz jaýlar týdyrǵan zalal shyǵynynyń qaıtarylýy sırek. Bundaı jaǵdaıda baspanamen qamtamasyz etý, olardyń materıaldyq problemalaryn sheshý máseleleri túgeldeı derlik Úkimet pen jergilikti atqarýshy organdardyń moınyna túsedi. Sondyqtan da tótenshe jaǵdaılardan saqtandyrý máselesin bizdiń qoǵam shapshań eńserýi kerek. Al stıhııalyq apattardan bolatyn shyǵyndardy óteý tetigin retteý úshin tıisti zańnamalarǵa ózgerister engizý qajet. Onda japa shekkenderge turǵyn úıler berý joldary, halyqty jáne olardyń múlikterin sý tasqyndarynan, tabıǵı apattardan saqtandyrý máseleleri qamtylýy shart», - deıdi V. Bojko.
Mınıstrdiń keltirgen deregine súıensek, AQSh-ta sý tasqyndarynan saqtandyrý júıeler tetigi ulttyq zańnamamen júzege asady. Onyń normalarynda halyqty mindetti túrde apat týraly habardar etý, olardyń ózindik qaýipsizdigi máseleleri qamtylǵan.
