Qoǵam pikirin eleýsiz qaldyrýǵa bolmaıdy – Áshimbaev kıberbýllıngke qarsy qujat týraly
Bıýro músheleri aldaǵy 14 sáýirde ótetin otyrystyń kún tártibin bekitti.
Senattyń kezekti otyrysynda depýtattar «Qazaqstan Respýblıkasynyń keıbir zańnamalyq aktilerine balanyń quqyqtaryn qorǵaý, bilim berý, aqparat jáne aqparattandyrý máseleleri boıynsha ózgerister men tolyqtyrýlar engizý týraly» zań jobasyn qaraıtyn bolady.
Bul qujat balalardy olarǵa qatysty kez kelgen zorlyq-zombylyqtan, onyń ishinde otbasylyq qatynastar, bilim berý jáne aqparat salalary boıynsha qorǵaý tetikterin jaqsartýǵa arnalǵan.
«Balalardy býllıngten jáne kıberbýllıngten qorǵaý mańyzdy mindetterdiń biri. Bul zań jobasynyń keıbir normalary qoǵamda qyzý talqylanǵanyn jaqsy bilemin. Kez kelgen zań jobasyn talqylaý kezinde halyqtyń osyndaı belsendiligi úlken mańyzǵa ıe. Qazirgi tańda senatorlar usynylǵan normalardy muqııat zerttep, barlyq pikirdi eskerip, jumys istep jatyr. Basty mindet – balalardyń quqyǵyn qorǵaıtyn sapaly zań qabyldaý. Bul rette qoǵamnyń pikirin eleýsiz qaldyrýǵa bolmaıtyny sózsiz. Óıtkeni zań jobasy «Halyq únine qulaq asatyn memleket» tujyrymdamasyna qaıshy kelmeýi kerek», – dedi Máýlen Áshimbaev.
Sonymen qatar beısenbide ótetin jıyn barysynda Tótenshe jaǵdaılar mınıstri ıÝrıı Ilınniń kóktemgi sý tasqyny boıynsha elimizdegi ahýal týraly baıandamasy tyńdalady.
Aıta keteıik, ótken aptada senator Sergeı Ershov osy taqyrypqa baılanysty depýtattyq saýal joldap, elimizdegi gıdrotehnıkalyq nysandardyń jartysyna jýyǵy apattyq jaǵdaıda turǵanyna nazar aýdarǵan edi. Osyǵan oraı Senat spıkeriniń bastamasymen aldaǵy otyrysqa Tótenshe jaǵdaılar mınıstrin shaqyrý jóninde sheshim qabyldandy.
