Qoǵam otbasylyq qundylyqtar ınstıtýtyna muqtaj - jýrnalıst
NUR-SULTAN, QazAqparat - Elordada «Otbasy ınstıtýtyn damytý: Qoǵam, bıznes, memleket» taqyrybyndaǵy alǵashqy koých-sessııa ótýde, dep habarlaıdy QazAqparat tilshisi.
«Men kún saıyn qoqysqa tastalǵan sábı, balalar men eresekter arasyndaǵy sýıtsıdtiń kóbeıýi, mektepten úıine kelgen jasóspirimniń ózine qol jumsaǵany týraly aıtamyn. Osyndaı jańalyqtardy aıtqan saıyn ózime «Nege bulaı bolyp jatyr? Qoǵamǵa ne bolǵan?» degen suraq qoıamyn», - deıdi jýrnalıst Sandı Sultan.
Sheshendik óner boıynsha sabaq beretin jýrnalıst jaqyn adamyńa ony jaqsy kóretinińdi jıi aıtý qanshalyqty mańyzdy ekenin aıtty.
«Sheshendik ónerden sabaq bergende dıktsııany durys qoıýdy ǵana úıretpeımin. Men psıholog bola bilemin. Keı oqýshy qyzdarǵa anasy «Sen ádemi emessiń, sondyqtan seni telearnaǵa jumysqa almaıdy» deıdi eken. Osydan keıin qyz bala ózine senimsiz bolyp, búkireıip júre bastaıdy. Men olarǵa ózine senimdi bolýǵa úıretip, ár adamnyń óz ereksheligi bar ekenin túsindiremin», - deıdi ol.
Ol elimizge otbasylyq qundylyqtardy damytatyn ınstıtýttar kerek ekenin aıtty.
«Qoǵam otbasylyq qundylyqtardy damytatyn ınstıtýttarǵa muqtaj. Elimizde Dýlat pen Dana Ábildınovter otbasy osyndaı ınstıtýt ashty. Men dál osy otbasynyń úlken jaýapkershilik arqalaǵany úshin qýanyshtymyn. Bul sharadan tanystarymdy, oqýshylarymdy kórdim. Biz ózimiz ómir súrip jatqan qoǵamdy baqyttyraq etkimiz keledi. Bul óte mańyzdy», - deıdi Sandı Sultan.
Avtor: Zarına Qaharman
