Qoǵam men besik tynyshtyǵyna qatar jaýaptymyz – polıtseı áıel
QOSTANAI. QazAqparat – Polıtsııa qyzmeti desek, kóz aldyńyzǵa tártip buzýshylarmen kúresetin jáne kez kelgen jaǵdaıda kómekke kelýge daıyn batyl azamattyń beınesi keledi. Biraq olardyń arasynda da názik jandardyń bar ekenin únemi eske ala bermeımiz. Sondaı qyzmetkerlerdiń biri – Sáýle Myrzamaǵambetova. Búginde ol Kóliktegi polıtsııa departamentiniń Qostanaı stantsııasyndaǵy jelilik polıtsııa bóliminde jaýapty qyzmette isteıdi, dep habarlaıdy QazAqparat.
Sáýle Myrzamaǵambetova jelilik polıtsııa bólimi bastyǵynyń kadr saıasaty jónindegi orynbasary qyzmetin atqarady. Іshki ister organy salasyna 2000 jyldyń aıaǵynda keldi.
«Ustazdyq qyzmetimdi polıtsııa salasyna aýystyrdym. QR ІІM Qostanaı zań ınstıtýtyn aıaqtap, osy salaǵa túpkilikti kettim. Bul mamandyqtyń qyr-syryn meńgere kele, ókinbegenimdi túsindim. Ár adam súıikti jumysynan lázzat alatyny ras qoı. Negizi áıel polıtseıler men er-azamattardyń qyzmettegi aıyrmashylyǵy joq dep oılaımyn. Ekeýiniń de mindeti – polıtsııada qyzmet etý, halyqqa kómektesý. Áıelderdi de myltyq atýǵa úıretip, tóbeles mashyqtaryna daıyndaıdy. Jaýaptylyq, ádildik, jedeldik sııaqty qasıetterdi kez kelgen tártip saqshysynyń boıynda bolýy tıis», - deıdi keıipkerimiz.
Pogon taqqan polıtseı – 3 uldyń anasy. Jumysynan kele sala nemeresiniń janynda bolyp, tárbıesin aıtady.
«Áıel polıtseıler qoǵam men besik tynyshtyǵyna qatar jaýapty. Qyzmet babynda úı sharýasyna únemi qolymyz tıe bermeıdi. Erte turyp jumysqa baramyz, keıde kesh kelemiz. Sonyń bári halyq tynyshtyǵy úshin ǵoı. Men polıtseılerdiń tárbıe jumysyn qadaǵalaımyz. Jas mamandar ózimniń balam sııaqty. Bilgenimdi úıretip, aqyl-keńes berip otyramyn», - deıdi polıtsııa mamany.
S.Myrzamaǵambetova bastamasymen oblysta túrli qaıyrymdylyq sharalary ótip turady. Máselen, Rýdnyıdyń balalar úıine kómek kórsetse, jańa jyl qarsańynda kópbalaly otbasyna azyq-túlik jetkizdi. Polıtseıdiń túrli baǵyttaǵy jumystary eleýsiz qalmady. «Polıtsııa úzdigi» nagradasy men ІІ jáne ІІІ dárejeli «Іshki ister organdaryndaǵy minsiz qyzmeti úshin» medaldary bar. Sonymen qatar «Qazaqstan polıtsııasyna 25 jyl» tósbelgisi qyzmetiniń jemisti bolǵanyn aıǵaqtaıdy.
Al kúni keshe QR ІІM mınıstri Erlan Turǵymbaev polıtseıdi «Quqyq tártibin qamtamasyz etýge qosqan úlesi úshin» medalimen marapattady.
