Qoǵam máselesin sheshetin jobalarǵa ǵana granttar bólinýi kerek – Aıda Balaeva

NUR-SULTAN. QazAqparat – Memlekettik tapsyrystar men granttar qoǵamda qalyptasqan máselelerdi sheshýge baǵyttalǵan jumystardy qarylandyrýy kerek. Bul týraly óziniń Facebook-paraqshasynda QR Aqparat jáne qoǵamdyq damý mınıstri Aıda Balaeva málim etti, dep habarlaıdy QazAqparat.

«Azamattyq qoǵam ınstıtýttaryn kópten beri mazalap júrgen suraqtardyń biri - memleket tapsyrys beretin áleýmettik mańyzy bar jobalardyń tizimin qurý máselesi. Olar rasynda mańyzdy ma? Tıimdiligi qandaı? Qoǵam men naqty adamǵa bereri ne? Eń bastysy - qandaı áleýmettik máseleni sheshýde? Jasyratyny joq, is júzinde kóp jobalardyń máni mańyzyna, bastamasy nátıjesine sáıkes kelmeı jatady. Óz basym bul jaǵdaıdy túbirimen ózgertip, barlyq jobalardy ashyq talqylaıtyn ýaqyt keldi dep esepteımin. Óıtkeni, memleket azamattyq qoǵam ınstıtýttaryn áriptes dep biledi ári senedi»,-dep jazdy mınıstr.

Osy rette ol óziniń usynysy boıynsha kun.kz ashyq medıa-alańynda búginnen bastap Qazaqstannyń Azamattyq alıansymen birlese otyryp, «Qoǵamdyq saraptama» jobasy jumysyn bastaǵanyǵyn jetkizdi. Onyń basty maqsaty - úkimettik emes uıym ókilderinen usynystar jınap, árbir túsken bastamanyń tıimdiligine saraptama jasap, kásibı baǵa berý.

«Taǵy da atap ótkim keledi, memlekettik tapsyrys pen granttar bólýdiń maqsaty tek qoǵamdyq uıymdardy qoldaý ǵana emes, eń aldymen, qoǵamnyń qajetin sheshetin isterdi qarjylandyrý. Árbirden soń bul barshamyzdyń ortaq múddemiz. Sóz joq, osyny túsinip, barynsha qoldaý kórsetip jatqan uıymdardyń kóptigi qýantady. Siz bolyp, biz bolyp bul mindetti de atqaramyz dep senemin»,-dedi Aıda Balaeva.