Qoǵam qazirgi zańdardy kez kelgen máseleni sheshýdiń kilti dep qabyldaıdy – Erlan Qoshanov
ASTANA. KAZINFORM – Elordada AMANAT partııasynyń máslıhat depýtattarynyń forýmy bastaldy. Іs-sharaǵa Memleket basshysy Qasym-Jomart Toqaev qatysyp jatyr.
«Sońǵy jyldary elimizde túbegeıli reformalar qolǵa alyndy. Konstıtýtsııalyq ózgerister nátıjesinde saıası ınstıtýttardyń úılesimdi jumysy jolǵa qoıyldy. Bul reformalar túıtkildi máselelerdi sheshýge, baıypty sheshimderdi qabyldaýǵa jol ashty. Zań shyǵarýshy organnyń qyzmeti men mazmuny da tolyqtaı ózgerdi. Kóppartııaly Parlament túrli pikirlerdi toǵystyrǵan qoǵamnyń únine aınaldy», - dedi Májilis Spıkeri, «AMANAT» partııasynyń tóraǵasy Erlan Qoshanov forýmnyń ashylýynda.
Onyń aıtýynsha, qazirgi ýaqytta kún tártibindegi kez kelgen másele Parlament qabyrǵasynda ashyq talqylanyp jatyr.
«Azamattardy alańdatqan eń kókeıkesti máseleler zańnamalyq deńgeıde sheshimin taýyp jatyr. Mysaly, halyqtyń nesıe qaryzy, áıelder men balalarǵa qatysty zorlyq-zombylyq, lýdomanııa, esirtkige táýeldilik, veıpter sııaqty keselderge zańmen tosqaýyl qoıyldy. Qasym-Jomart Kemeluly, osynyń bári – ózińiz aıtyp júrgen zań ústemdigi men tártip qaǵıdasynyń is júzindegi kórinisi. Buǵan qosa, ádildikke sýsap otyrǵan halyqtyń talap-tilegi oryndalyp jatyr. Oń ózgeristerdi qoǵam shynaıy sezinip otyr. Osy oraıda birqatar mańyzdy zań qabyldandy. Sonyń nátıjesinde qoldy bolǵan aktıvter, zańsyz shetel asqan qarajat qaıtarylýda. «Ulttyq qor – balalarǵa» jobasynyń jemisin ár bala, ár otbasy kóre bastady», - dedi E.Qoshanov.
Sonymen birge, zańnamalyq jumystardyń jańa baǵdary qazaq parlamentarızminiń damýyndaǵy bir beleske aınaldy. Zań shyǵarý isinde pikir alýandyǵy men ıdeıalardyń shynaıy básekesine basymdyq berilip otyr.
«Bir sózben aıtqanda, qoǵam qazirgi zańdardy kez kelgen máseleni sheshýdiń kilti retinde qabyldaıdy. Munyń bári – Memleket basshysy usynǵan «Myqty Prezıdent – yqpaldy Parlament – esep beretin Úkimet» formýlasynyń naqty nátıjesi. Osy algorıtm aımaqtyq deńgeıde tıimdi jumys isteıtin bolsa, qordalanǵan máselelerdiń kóbin jergilikti jerdiń ózinde-aq sheshýge qol jetkizemiz», - dedi partııa tóraǵasy.
Aıta keteıik, forýmǵa qatysýshylar qatarynda Parlament Senaty men Májilis tóraǵalary, Premer-Mınıstr, Memlekettik keńesshi, Prezıdent Ákimshiliginiń basshylyǵy, Úkimet músheleri, Parlament jáne máslıhat depýtattary bar.
