Qoǵam qaıratkerleri kezekten tys Prezıdenttik saılaýdy baqylaý úshin Respýblıkalyq qoǵamdyq komıssııa qurdy

Búgin komıssııa músheleri Astanada jýrnalısterge arnap baspasóz máslıhatyn ótkizdi.

Komıssııaǵa qoǵam, ǵylym men shyǵarmashylyq qaýym ókilderi endi. Olardyń arasynda qoǵam qaıratkeri Murat Áýezov, akademık Tóregeldi Sharmanov, jazýshy Smaǵul Elýbaı, jazýshy, dramatýrg Dýlat Isabekov, Sarapshy-jýrnalıster klýbynyń tóraǵasy Ǵadilbek Shalahmetov, «Aıt-park» pikirsaıys klýbynyń tóraǵasy Nurlan Erimbetov, qoǵam qaıratkeri Dosmuhamet Nur-Ahmet, qoǵam qaıratkeri, rejısser Igor Vovnıanko, «Abaı-aqparat» qazaq ınternet keńistigin damytý qory» QQ vıtse-prezıdenti Aıdos Sarym, «Dýman» mádenı-oıyn saýyq kesheniniń bas dırektory Patıma Matjanova jáne taǵy basqalar bar. Qoǵamdyq komıssııanyń teń tóraǵalary - T.Sharmanov pen N.Erimbetov.

N.Erimbetovtyń aıtýynsha, komıssııa músheleri saılaýaldy jáne saılaý barysy is-sharalaryna baqylaý jasap, qandaı da bir buzýshylyqtarǵa jol berilmeýin qadaǵalaıtyn bolady. Atap aıtqanda, saılaýaldy úgit-nasıhat naýqany barysynda ákimshilik resýrstardyń paıdalaný-paıdalanbaýyna, onyń ádiletti ótýine, oqý ýaqytynda mektep oqýshylary men stýdentterdiń kópshilik kórinister úshin paıdalanylmaýyna, saılaý komıssııalaryna barlyq partııa ókilderiniń enýi men saılaýshylar tizimderiniń durystyǵyna nazar aýdaratyn bolady. Komıssııa músheleriniń barlyǵy derlik qandaı da bir partııanyń múshesi bolyp tabylmaıtyndyqtan jáne bılikke qatysy bolmaǵandyqtan, prezıdenttikke úmitker eshbir kandıdattyń múddesin lobbılamaıdy.

Komıssııa, baqylaý barlyq aımaqtarda teń júrgizilý úshin kómekke eriktilerdi tartýdy kózdep otyr. Aldymen olardyń tizimderin jasaqtap, keıin quqyq zańnamalaryn úıretpek.

Onyń sózine qaraǵanda, buzýshylyqtar anyqtalǵan jaǵdaıda, komıssııa músheleri aldymen, buqaralyq aqparat quraldary arqyly ózderiniń qoǵamdyq pikirlerin bildirmek. Ol ádis jaǵdaıdy túzeýge qolǵabys etpese quzyrly organdarǵa - Ortalyq saılaý komıssııasyna, prokýratýra men quqyq qorǵaý organdaryna shaǵymdanady.

Respýblıkalyq qoǵamdyq komıssııa QR Ortalyq saılaý komıssııasyna ózderin baqylaýshy retinde tirkeý týraly resmı ótinishin búgin bildiredi. «OSK ótinishimizdi qabyldamaı qoıady dep oılamaımyn. Barlyǵymyzda baqylaýshy ekendigimizdi rastaıtyn kýálikter bolady. Ol kez-kelgen saılaý ýchaskisinde saılaý barysynda jáne odan keıingi ýaqytta bolýǵa quqyq beredi», - dedi Aıdos Sarym.

Komıssııa shtaby Astanada (baılanys telefony: 8 (7172) 32-67-01) ornalasady. Qoǵam qaıratkerleri kelip-túsken hattar boıynsha óńirlerge shyǵyp turýdy josparlap otyr.