Qoǵam qaıratkeri Bátıma Saqaýovaǵa arnalǵan kitap jaryq kórdi
TALDYQORǴAN. QazAqparat - Taldyqorǵanda memleket jáne qoǵam qaıratkeri Bátıma Saqaýovaǵa arnalǵan «Bátıma ana» kitabynyń tusaýy kesildi. Bes bólimnen turatyn kitapta «Qurmet» ordeniniń ıegeri, Almaty oblysynyń qurmetti azamaty, el anasy jaıynda estelikter, maqalalar, óleńder men ocherkter toptastyrylǵan, dep habarlaıdy QazAqparat tilshisi.
Bátıma Esbolatqyzy Saqaýova uzaq jyldar memlekettiń órkendeýine, Jetisý óńiriniń damýyna úles qosqan dara tulǵa. Sonaý surapyl soǵys jyldarynda 16 jasynan jumysqa aralasyp, Keńes dáýirinde aýdandyq partııa komıtetiniń jaýapty qyzmetterin atqardy. Qazaqstan táýelsizdiginiń alǵashqy jyldarynda memlekettiń aıaqqa turýyna kúsh-jigerin, aqyl-keńesin aıamaǵan el anasy.
«Bátıma ana» kitaby basty keıipkerdiń ǵıbratty ǵumyrynan syr shertip, onyń ómirlik jolyndaǵy túrli tarıhı sátterdi sýretteıdi. Jastarǵa tálimi men tárbıesi mol týyndynyń jaryq kórýine sebepshi bolǵan QR Parlamenti Májilisiniń depýtaty Serik Úmbetov. Al kitaptaǵy materıaldardy toptastyryp jınaqtaǵan ardager jýrnalıst, Almaty oblysynyń qurmetti azamaty Kúmisjan Baıjan.
Memleket jáne qoǵam qaıratkeri Bátıma Saqaýova 2018 jyldyń 10 aqpanynda 92 jasqa qaraǵan shaǵynda dúnıeden ozdy.
