Jańa Konstıtýtsııada «ult saýlyǵy» uǵymyna alǵash ret nazar aýdaryldy — Prezıdent
ASTANA. KAZINFORM — Memleket basshysy jalpyulttyq referendýmǵa belsendi qatysqan medıtsına mamandaryna rızashylyǵyn bildirdi.
Óz sózinde Prezıdent qazir ádiletti, kúshti, ozyq ári taza Qazaqstan qurylyp jatqanyn, qoǵamnyń barlyq salasynda aýqymdy jáne túbegeıli ózgerister jasalǵanyn atap ótti.
— Bizdiń alǵa qoıǵan maqsatymyz — aıqyn. Bul — jas urpaqtyń ıgiligi úshin tuǵyry berik, qýatty memleketti qurý. Naýryz aıynda ótken jalpyulttyq referendým kezinde azamattarymyz otanshyldyq pen jaýapkershiliktiń tamasha úlgisin kórsetti. Medıtsına salasynyń mamandary da osy ortaq iske belsene atsalysty. Saıası naýqan barysynda halqymyz birtutas ult bolyp uıysyp, tarıhı tańdaýyn jasady. Jurtymyz el taǵdyryna beı-jaı qaramaı, jańa Konstıtýtsııany qoldap daýys berdi. Bul jarqyn bolashaqqa jol ashatyn asa mańyzdy sheshim bolǵany anyq, — dedi Memleket basshysy.
Prezıdent jańa Ata zańda densaýlyq saqtaý máselesine aıryqsha mán berilgenin eske saldy.
— Memleketimizdiń myzǵymas tiregi — jańa Ata zańymyzda densaýlyq saqtaý máselesine aıryqsha mán berildi. Biz ult saýlyǵy uǵymyna alǵash ret keń aýqymda nazar aýdardyq. Soǵan sáıkes Konstıtýtsııada qoǵamdyq tártipti qamtamasyz etý, qorshaǵan ortany qorǵaý jáne tabıǵı baılyqqa uqypty qaraý qaǵıdattary aıqyndaldy. Bul adam ómirin saqtaý medıtsına mamandarynyń mindeti ǵana emes, tutas qoǵamnyń jaýapkershiligi ekenin kórsetetin mańyzdy qadam boldy, — dedi Qasym-Jomart Toqaev.
Aıta keteıik, Aqordada Prezıdent medıtsına qyzmetkerlerin kásibı merekesimen quttyqtady.
Elimizde maýsymnyń ər úshinshi jeksenbisi — medıtsına qyzmetkerleriniń kúni. Bul kúndi atap ótý QR Prezıdentiniń 1998 jylǵy Jarlyǵymen belgilengen.
