Qoǵam bizden shynaıy jáne pármendi sharalar kútip otyr – Álıhan Smaıylov

NUR-SULTAN. QazAqparat – Bizdiń basty mindetimiz – halyqtyń tabysyn arttyrý jáne turmys sapasyn jaqsartý. Bul týraly Úkimet otyrysynda QR Premer-Mınıstri Álıhan Smaıylov aıtty, dep habarlaıdy QazAqparat tilshisi.

«Qazirgi jaǵdaıda biz judyryqtaı jumylyp, naqty nátıje kórsetýimiz qajet. Qoǵam bizden shynaıy jáne pármendi sharalar kútip otyr. Aldymyzda úlken jumys kútip tur. Memleket basshysynyń árbir tapsyrmasyn jedel jáne tıimdi oryndaýymyz qajet. Bizdiń basty mindetimiz – halyqtyń tabysyn arttyrý jáne turmys sapasyn jaqsartý», - dedi Álıhan Smaıylov.

Sonymen qatar Úkimet basshysy básekege qabiletti jáne ártaraptandyrylǵan ekonomıkany damytýǵa kúsh salý qajettigin basa aıtty.

«Árbir mınıstr men ákim qabyldanatyn sharalardyń sapasy men jedeldigi úshin jeke jaýapty bolady», - degen Premer-Mınıstr orynbasarlaryna ózderi jetekshilik etetin salalary jáne memlekettik organdar boıynsha naqty úılestirý men baqylaýdy qolǵa alýdy tapsyrdy.