Qoǵam belsendileri ÚEU týraly arnaıy zań qabyldaýdy usyndy
Azamattyq qoǵam ınstıtýttarynyń ókilderi «Qazaqstan Respýblıkasyndaǵy úkimettik emes uıymdar týraly» jańa zań ázirleýdi usynýda, dep habarlaıdy Kazinform.
Aıta keteıik, elordada Qazaqstannyń respýblıkalyq XI azamattyq forýmy ótip jatyr. Azamattyq Alıanstyń vıtse-prezıdenti Gúlnar Qurbanbaeva negizgi is-sharaǵa deıin 5 aı boıy 20 óńirde azamattyq forým ótkizilgenin aıtty. Bul jıyndarda qoǵam belsendileri jergilikti jáne ortalyq memlekettik organdarǵa 400-den astam usynys jınaǵan.
Qazirdiń ózinde biz (azamattyq qoǵam – red.) daıyn strategııalyq seriktesterge aınaldyq, biz ózimiz zertteý júrgize alamyz, memlekettik aýqymdaǵy strategııalar men josparlar jasaı alamyz. Sondyqtan biz osyndaı strategııalyq seriktestikti usynamyz jáne úkimettik emes uıymdar týraly jeke zań qabyldaý qajet dep sanaımyz. Sonymen qatar, úkimettik emes sektordyń ustanymdary men pikirlerin eleı bermeıtin memlekettik organdarǵa talaptardy qatańdatý mańyzdy dep sanaımyz. Syrttaı bári jaqsy, olar bizdi tyńdaǵandaı túr tanytady, biraq sodan keıin eshqandaı áreket bolmaıdy. Tipti birlesken jospardy qabyldasaq ta, eshteńe sheshilmeı keledi. Sondyqtan úkimettik emes uıymdardyń mártebesi, olardy ákimshilendirý, tirkeý máseleleri jeńildetilýi tıis», - dep esepteıdi Gúlnar Qurbanbaeva.
Bul zań úkimettik emes uıym qurýdyń qarapaıym protsedýralaryn retteýdi, salyq jeńildikterin berýdi, memlekettik jáne kvazımemlekettik qurylymdarmen ózara árekettesý úshin aıryqsha quqyqtyq mártebe berip, úkimettik emes uıymdardy memlekettik granttar men syılyqaqylar arqyly qarjylandyrýdy qamtamasyz etýi kerek.
Gúlnar Qurbanbaevanyń aıtýynsha, usynymdardyń ekinshi bóligi salalyq baǵytta, qoǵam problemalarynyń naqty sheshimderimen baılanysty.
«Dálirek aıtqanda, bul esirtki tutyný, jastar arasyndaǵy jynystyq qatynas, ınklıýzııa sııaqty densaýlyq saqtaý salasyndaǵy máseleler. Keı tusta turǵyn úı, emdeýdi qarjylandyrý máseleleri de qalady. Osyndaı erekshe usynystar da bar, óıtkeni bul qoǵamnyń ózin qalaı sezinetinine jáne onyń memleketke degen kózqarasyna kóp áser etedi», - dedi Azamattyq alıanstyń vıtse-prezıdenti.
Azamattyq forým sheńberinde halyqaralyq trenerlerdiń qatysýymen sheberlik synyptary, áleýmettik jobalardyń kórme-tusaýkeserleri, dıalog alańdary, qaıyrymdylyq salasyndaǵy ataqtar, sondaı-aq «Tańdaý» respýblıkalyq qoǵamdyq syılyǵy tabys etiledi jáne áriptestik kelisimder men memorandýmdarǵa qol qoıylady.
