Qoǵam belsendisi Ǵaly Baqtybaevtyń ólimi: Alqabıler 2 kúdiktini aqtap aldy
Ǵaly Baqtybaevtyń qazasyna qatysty rezonansty is Qaraǵandy oblysynyń qylmystyq ister jónindegi mamandandyrylǵan aýdanaralyq sotynda alqabılerdiń qatysýymen qaraldy. Іs boıynsha tóraǵalyq etýshi sýdıa bolyp Qaırat Qasymov taǵaıyndaldy.
Prokýror kúdiktiler Azamat Bókenaev pen Ǵalym Ahmedjanovqa jazasyn qaýipsizdigi eń joǵary mekemede óteýmen, 20 jylǵa bas bostandyǵynan aıyrýdy surady. Al Iman Mııashovti aıyptaý baptarynyń jıyntyǵyn jáne burynǵy quqyq buzýshylyqtaryn eskere otyryp, jazasyn qaýipsizdigi tótenshe mekemede óteýmen 25 jylǵa túrmege qamaý usynyldy.
Bastapqyda úkimniń jarııalanýy 28 mamyr, jumaǵa belgilengen bolatyn. Alaıda sýdıa sheshimdi úsh kúnge shegerdi. Biraq 31 mamyrda alqabılerdiń biriniń syrqatyna baılanysty úkimdi jarııalaý 1 maýsymǵa aýystyryldy. Búgin sot úkimi shyǵaryldy.
Azamat Bókenaev, Ǵalym Ahmetjanov jáne Iman Mııashov Ǵaly Baqtybaevtyń ólimine kinásiz dep tanyldy. 12 alqabıdiń 10-y aqtaý úkimi úshin daýys berdi.
«Daýys berý qorytyndysy boıynsha Baqtybaevty óltirýdi uıymdastyrǵany jáne jasaǵany úshin aıyptalǵan Azamat Bókenaev, Ǵalym Ahmedjanov, Iman Mııashovqa qatysty aqtaý úkimine 10 alqabı daýys berdi. Alqabılerdiń úkimi negizinde A.Bókenaev, Ǵ.Ahmedjanov qylmystyq quqyq buzýshylyqtardy jasaýǵa sottalýshylardyń qatysy bary dáleldenbegeni úshin aqtaldy», - dedi sottyń baspasóz qyzmetinen.
Alqabıler Iman Mııashovty aıyptaýdyń negizgi baby boıynsha aqtasa da, ol Baqtybaevtyń densaýlyǵyna ortasha dárejede zııan keltirgeni úshin kináli dep tanylyp, 5 jylǵa bas bostandyǵynan aıyryldy.
Esterińizge sala keteıik, Ǵaly Baqtybaevty 2019 jyldyń 28 mamyrynda óz úıiniń tabaldyryǵynda óltirip ketken. Tergeý málimetteri boıynsha, kisi óltirýge tapsyrys berýshiler Atasý kentiniń turǵyndary – bıznesmen Azamat Bókenaev jáne burynǵy polıtseı Ǵalym Ahmedjanov bolǵan. Ekeýi bir mıllıon teńgege kıller jaldap, ony qarý-jaraqpen qamtamasyz etken. 28 jyldyń 2019 mamyrynda óltirýshi buıryqty oryndap, oqıǵa ornynan qashyp ketti.