Qoǵam belsendileri beıbitshilik pen kelisimdi saqtaý qaǵıdattaryn Jezqazǵan jastarymen talqylady

JEZQAZǴAN. QazAqparat - Jezqazǵanda «Polıetnıkalyq Qazaqstan: ulttyq birliktiń qalyptasýy jaǵdaıyndaǵy etnomádenı genezıs» taqyrybynda ǵalymdar men qoǵam qaıratkerleriniń jastar ókilderimen oblystyq kezdesýi ótti. Іs-shara el táýelsizdiginiń 30 jyldyǵyn merekeleý aıasynda ótkizildi, dep habarlaıdy QazAqparat Qaraǵandy oblysy ákimdiginiń saıtyna silteme jasap.

Kezdesý jastarga tarıhı-mádenı sıntez jaǵdaıynda qazaqstandyq qoǵamnyń qundylyqtaryn dáripteý úshin uıymdastyryldy. Oǵan jergilikti memlekettik organdardyń basshylary, jastar belsendileri, oblystyń qalalary men aýdandarynyń etnomádenı birlestikteriniń ókilderi qatysty.

– QHA-nyń XXIX sessııasynda sóılegen sózinde Elbasy Nursultan Ábishuly Nazarbaev memlekettik saıasattyń bes qaǵıdatyn jáne taıaý jyldardaǵy ulttyń jańa biregeıligin atap ótti. Bul – memleket pen azamattar arasyndaǵy senim men ózara is-qımylǵa negizdelgen qazaqstandyq patrıotızm; azamattyq teńdik; memlekettik tildiń biriktirýshi róli; áralýandyqtaǵy birlik; ultty únemi jańǵyrtý, – deıdi Qaraǵandy oblysy Іshki saıasat basqarmasynyń basshysy Erlan Qusaıyn. – Olar qazirgi kezeńde qoǵamdyq kelisim men birlikti qamtamasyz etýdegi memlekettik saıasatty kórsetedi.

Іs-shara spıkerleri retinde Qazaqstan halqy Assambleıasynyń ǵylymı-saraptamalyq keńesiniń tóraıymy Aıgúl Sádýaqasova, QR eńbek sińirgen qaıratkeri Rymbala Omarbekova, bilim berý salasynyń qurmetti qyzmetkeri jáne metsenat Bekzat Altynbekov, kásibı medıator Sherzod Pýlatov, oblystyq QHA ǵylymı-saraptamalyq tobynyń tóraǵasy Vılen Molotov-Lýchanskıı, Qazaqstan halqy Assambleıasynyń respýblıkalyq jastar qozǵalysynyń tóraǵasy Tımýr Jumyrbaev, sondaı-aq «Qazaqstannyń 100 jańa esimi» jobasynyń jeńimpazy Daryn Ábiljanov sóz sóıledi.

Іs-shara Jezqazǵannyń oqýshy jáne stýdent jastarymen kezdesýmen jalǵasty. Odan ári sharaǵa qatysýshylar «Joshy han» tarıhı-mádenı keshenine bardy.

Osyndaı kezdesý Sábaev qalasynyń belsendilerimen de ótti. Spıker retinde «Qoǵamdyq kelisim» KMM dırektory Áıgerim Isbekova jáne «Qazaqstannyń 100 jańa esimi» baıqaýynyń jeńimpazy Aleksandr Ýrmashov sóz sóıledi.