Qoǵam belsendileri aýyl sharýashylyǵy jerlerin utymdy paıdalanýǵa shaqyrdy
Parlament Májilisiniń baspasóz qyzmetinen málim etkendeı, dóńgelek ústel otyrysy barysynda quqyqqorǵaýshy Erlan Qalıev aýylsharýashylyq jerlerin jalǵa alý máselelerin jetildirý qajettigin qoldady.
Onyń aıtýynsha, azamat jer telimin jalǵa alǵan kezde kelisimshart jasalyp, onyń quqyqtary men mindetteri belgilenedi, adamnyń jaýapkershiligi kórsetiledi. Atalǵan tetikti aýyl sharýashylyǵyna engizý zańnanamaǵa úlken ózgeristerdi qajet etpeıdi. Osy rette E. Qalıev depýtattyq korpýstan aıtylǵan usynystardy neǵurlym tezirek zańdastyrýdy surady.
Azamattyq qoǵam belsendisi Jánibek Qojyq máselelerdiń sheshimin tabýdy jedeldetýge nazar aýdardy.
«Biz salyq máselelerin júıeleıtin bolsaq, kóptegen problema sheshimin tabatyn bolady. Jaqynda kóktemgi jumystar bastalady. Jerdi paıdalanýǵa baılanysty jaýapkershilikti kúsheıtý qajet»,- dedi J.Qojyq.
Aıgúl Orynbek jerdi utymdy paıdalanýda zamanaýı tehnologııalar men tásilder, ásirese, ǵaryshtan monıtorıng jasaý arqyly baqylaýdy kúsheıtýdiń mańyzdylyǵyna toqtaldy. «Menińshe, ǵaryshtyq baqylaý - ol eń aldymen, Elbasy kórsetken baǵytty júzege asyrý. Bul jemqorlyqtyń jolyn kesýge múmkindik beredi», - dedi ol.
Sondaı-aq Syzdyq Bolat biryńǵaı agrarlyq salyqty engizýge qoldaý bildire kele, ony júzege asyrýdyń múmkindikteri bar ekenin alǵa tartty.
Ózekti máseleni talqylaýǵa úkimettik emes sektor ókilderi, aýylsharýashylyq taýaryn óndirýshiler, Májilis depýtattary, Aýyl sharýashylyǵy mınıstrligi, basqa da memlekettik organ ókilderi qatysty.