Kodeks jobasy: Sot sheshimin oryndamaǵan azamattar 100 AEK aıyppuldy birneshe ret tóleıdi
NUR-SULTAN. QazAqparat – Qazaqstanda aldaǵy ýaqytta sot sheshimin oryndamaǵan azamattarǵa 100 AEK kólemindegi aıyppul birneshe ret belgilenýi múmkin. Senatorlarǵa Ákimshilik rásimdik-protsestik kodeksiniń jobasyn tanystyrǵan Ádilet mınıstri Marat Beketaev tyń ózgerister arqyly osyndaı jazalaý tetigin engizýdi usyndy, dep habarlaıdy QazAqparat tilshisi.
«Ákimshilik sot isin júrgizý bóliginde jobada mynadaı negizgi erejelerdi engizý kózdeledi. Sot isin júrgizýdiń jańa túriniń ereksheligi – dáleldemelerdi jınaý protsesinde sot belsendiliginiń kúsheıýi. Búgingi tańda bılik organdary daýlardy azamattyq sot isin júrgizý tártibimen qaraıdy. Alaıda qoldanystaǵy tártip bir jaǵynan bılik organy jáne ekinshi jaǵynan azamattyń is júzinde teń emestigin eskermeıdi», - dedi Marat Beketaev senatorlarǵa Májilis maquldaǵan Ákimshilik rásimdik-protsestik kodeksiniń jobasyn tanystyra otyryp.
Mınıstrdiń aıtýynsha qazir «belsendi ról» prıntsıpin basshylyqqa ala otyryp, sot dáleldemelerdi derbes jınap, daýdyń mán-jaıyn anyqtaýǵa mindetti.
«Sol úshin sot aktileriniń oryndalýyna sot baqylaý ınstıtýty engiziledi. Atap aıtqanda, sottyń talaptaryn ýaqtyly oryndaýdy qamtamasyz etý maqsatynda júz aılyq eseptik kórsetkishke deıin aqshalaı jazalardy birneshe ret qoldaný múmkindigi kózdeledi», - dedi Marat Beketaev.
