Kodeks qaǵazda bar, is júzinde joq: naýqas sapaly dári alý úshin úıin satýǵa májbúr
ASTANA. KAZINFORM – Qazaqstan Respýblıkasy Parlamenti Májilisiniń depýtaty Ashat Aımaǵambetov onkologııalyq naýqastardyń sapaly dárilik qamtamasyz etilýi týraly pikir bildirdi.
— «Halyq densaýlyǵy týraly» kodekste árbir azamattyń tegin dárimen qatar, qosymsha tólem arqyly ózine qajet dárini tańdaý quqyǵy aıqyn kórsetilgen. Memleket belgili bir dárini tegin beredi, biraq eger naýqas sol dıagnozǵa arnalǵan basqa túpnusqa nemese baǵasy qymbatyraq dárini alǵysy kelse, onyń baǵasyndaǵy aıyrmashylyqty ózi tólep, sol dárini alýǵa quqyly. Alaıda bul norma tek qaǵaz júzinde qaldy. Іs júzinde ol tolyqqandy jumys istemeıdi. Birneshe pılottyq joba bastalǵanymen, úlesaqy tetigi naýqasqa deıin jetpeı otyr. Adamdarǵa bul júıeniń paıdasyn kórý múmkindigi berilmeı keledi. Bul másele ásirese onkologııa salasynda óte ózekti. Hımıoterapııaǵa qatysty aıtsaq — bul ymyra kótermeıtin sala. Sebebi munda qate sheshim adam ómirine tikeleı áser etedi. Onkolog dárigerlerdiń ózi, jeke sóıleskende, emniń senimdi ári tıimdi bolýy úshin dáleldengen túpnusqa preparattardy qoldaný qajet ekenin aıtady. Al otandyq ónimderge kelsek, olardyń bári tıimsiz deýden aýlaqpyz. Biraq basty másele — bul dárilerdiń sapasy men tıimdiligi qalaı jáne qanshalyqty tekseriledi? Shıkizat elge kirgende baqylaý bar ma? Keıin qandaı qadaǵalaý júrgiziledi? Bul jaýapsyz qalyp otyrǵan suraq, — dedi Ashat Aımaǵambetov.
Depýtattyń aıtýynsha, qazir naýqastardyń sapaly túpnusqa dárilerdi alý múmkindigi shekteýli.
— Al sapaly túpnusqa hımıoterapııaǵa qajet preparattardyń baǵasy óte qymbat. Kóptegen otbasy úıin satyp, nesıege belshesinen batyp, jaqynyna «naǵyz» em, sapaly «hımııa» alyp berýge májbúr, — dep atap ótti ol.
Sonymen birge, Aımaǵambetov onkologııa salasynda qoldanylatyn dárilerdiń sapasyn baqylaýdy kúsheıtý qajettigin aıtty.
— Sondyqtan bizge naqty ári batyl qadam qajet. Onkologııada qoldanylatyn, sonyń ishinde otandyq óndiris arqyly OTP boıynsha shyǵarylatyn dárilerdiń bıoekvıvalenttiligi men klınıkalyq tıimdiligin mindetti túrde tekseretin júıeni engizý, sapasyn qamtamasyz etý. Zańda bar úlesaqy tetigin shynaıy túrde iske qosý. Azamattyń túpnusqa, naqty saýda ataýymen shyǵatyn dárini qosymsha aqy tólep alýyna naqty múmkindik berilýi tıis. Onkologııalyq naýqastardy sapasy anyq emes balamamen emes, shyn máninde sapaly ári dáleldengen hımııalyq preparattarmen qamtamasyz etý kerek, — dedi Májilis depýtaty.
Aıta ketelik 2026 jylǵa qaraı ár qazaqstandyqtyń elektrondyq densaýlyq pasporty bolady.