Kóbinese ortasha jáne aǵymdaǵy jóndeýden ótken joldardyń sapasy synǵa alynyp otyr - Avtokólik joldary komıteti
ASTANA. Sáýirdiń 28-i. QazAqparat /Rýslan Ǵabbasov/ - Jol qurylystaryna 240 mıllıard teńge qarastyrylyp otyr.
Bul týraly búgin Astanada Kólik jáne kommýnıkatsııa mınıstrligi Avtokólik joldary komıtetiniń tóraǵasy Zamır Saǵynov aıtty, dep habarlaıdy QazAqparat.
«2010 jyly avtokólik joldary salasyndaǵy sharalarǵa toqtalatyn bolsaq, jalpy qoldanystaǵy joldarǵa, onyń ishinde Jol kartasy aıasyndaǵy qarjylandyrýdy eskergende jol qurylystaryna 240 mıllıard teńge qarastyrylyp otyr»,-dedi komıtet basshysy. Onyń sózine qaraǵanda, respýblıkalyq joldarǵa 173,8 mlrd. teńge, jergilikti joldarǵa 37,3 mlrd. teńge, sondaı-aq Jol karatasy boıynsha 29,2 mlrd. teńge bólinbek.
Qazirgi kezde paıdalanylyp otyrǵan joldardyń ahýalyna toqtalǵan Z. Saǵynov, búginde avtokólik joldarynyń 66 paıyzy jaqsy jáne qanaǵattanarlyq jaǵdaıda ekenin jetkizdi.
«Jalpy qoldanystaǵy, sondaı-aq jergilikti jelidegi joldardy qosqanda 5 myń shaqyrymnan astam avtojoldy jóndeý jumystarymen qamtý kózdelip otyr», -dedi komıtet basshysy.
Qazirgi kezde Úkimet basshysynyń jáne mınıstrliktiń blogyna joldardyń jaǵdaıyna baılanysty saýaldar túsip jatqanyn aıtyp ótken ol, «mınıstrdiń blogyna 2009 jyldyń aqpany men 2010 jyldyń sáýiri aralyǵynda túsken 600-den astam saýaldyń 249-y avtokólik joldary komıtetine tıesili. Atap aıtqanda bul jergilikti jáne respýblıkalyq mańyzdaǵy joldarǵa qatysty. Onyń ishinde 112 saýaldaǵy máselede respýblıka boıynsha jol qyzmetteri synǵa alynǵan», dedi. Z. Saǵynovtyń aıtýynsha, el turǵyndary tarapynan kóbinese ortasha jáne aǵymdaǵy jóndeýden ótken joldardyń sapasy synǵa alynǵan.
Aıta keteıik, 2009 jyly bul salanyń bıýdjeti 199,5 mlrd. teńgeni quraǵan edi. Onyń ishinde respýblıkalyq joldarǵa 101 mlrd. teńge, al jergilikti joldarda 98 mlrd. teńge ıgerildi.
