Kóbine tómengi satydaǵy oryndaýshylar jaýapkershilikke tartylady - senator
Aıta keteıik, palatanyń jalpy otyrysynda «QR Úkimeti men Esep komıtetiniń 2018 jylǵy respýblıkalyq bıýdjettiń atqarylýy týraly esepteri talqylandy.
«2018 jylǵa arnalǵan respýblıkalyq bıýdjettiń negizgi parametrleri týraly baıandamashylar aıtyp ótti. Makroekonomıkalyq jaǵdaıdyń qolaıly sharttarynda respýblıkalyq bıýdjettiń negizgi baǵyttary iske asyryldy. Óndiris pen saýda ósiminiń arqasynda, sondaı-aq munaı baǵasynyń ósýi arqasynda ekonomıkanyń ósimi qamtamasyz etildi. Sońǵy ýaqyttary bıýdjetti oryndaý jańa sapaly satyǵa ótti. Alaıda, áli sheshimin tappaǵan birqatar máseleler bar. Esep komıtetiniń málimetine sáıkes, kvazımemlekettik sala sýbektileri tıimdiliginiń tómendigi baıqalady. Kvazımemlekettik salanyń jalpy taza kirisi 2018 jyly 18 paıyzǵa ǵana ósip, al shyǵystary 5 esege artty. Búgingi kúni osy sektordaǵy sýbektiler qyzmetindegi nátıjeniń jetkiliksizdiginen bıýdjetke dıvıdentterdiń túsýi durys qamtamasyz etilmeı otyr», - dedi Á. Qurtaev.
Onyń sózine qaraǵanda, sońǵy 4 jylda dıvıdentterdiń jáne taza kiris tólemderiniń kólemi eki esege jýyq qysqardy. Al jyl saıyn osy salaǵa memlekettik bıýdjetten kólemdi mólsherde qarjy bólinip keledi. Sondyqtan QR Prezıdenti Qasym-Jomart Toqaevtyń jańa memlekettik kompanııalardy qurýǵa moratorıı jarııalaýy ýaqtyly ári qajetti sheshim.
«Qazir bizge ekonomıkadaǵy kvazımemlekettik salanyń róli men naqty qatysý parametrlerin anyqtaý qajet. Úkimetke kvazımemlekettik sektor sýbektilerine berilip otyrǵan resýrstardy utymdy paıdalaný jáne olardy tıimdi basqarýǵa qyzyqtyrý maqsatyndaǵy tıisti sharalardy ázirlegen jón. Ekinshiden, bıýdjet qarjysyn tıimdi emes paıdalaný máselesin jáne bıýdjet baǵdarlamasyndaǵy basshylardyń tıisti jaýapkershiliginiń bolmaýyn Parlament depýtattary birneshe ret kóterdi. Esep komıteti kórsetkendeı, 2018 jyly sapaly emes bıýdjettik sheshimder 138 mlrd teńgeniń tıimsiz shyǵystaryna, onyń ishinde 26 mlrd teńge qarjylyq buzýshylyqtarǵa ákeldi», - dedi senator.
Osy oraıda ol memlekettik aýdıttiń nátıjesi boıynsha laýazymdy tulǵalardyń jaýapkershiligi týraly engizilip otyrǵan eskertpeler olardyń formaldy túrde oryndalýyna baılanysty tıisti nátıje bermeı otyrǵandyǵyn atap ótti.
«Kóp jaǵdaılarda tek tómengi satydaǵy oryndaýshylar tártiptik jaýapkershilikke tartylady. Osy máseleniń sheshimi qoldanystaǵy zańnamaǵa buzýshylyqtyń aýyrtpalyǵyna qaraı, qarjylyq buzýshylyqtar úshin, sondaı-aq memlekettik aktıvterdi jáne bıýdjettik qarajatty tıimsiz josparlaý ári tıimsiz paıdalaný úshin laýazymdy tulǵalardyń jaýapkershiligin kúsheıtý bóliginde ózgerister engizýdi talap etedi», - dedi Álimjan Qurtaev.
