Kóbeıtuz jalǵa berilmeıtin boldy
AQMOLA OBLYSY. QazAqparat – Aqmola oblysynyń Tabıǵı resýrstar jáne tabıǵatty paıdalanýdy retteý basqarmasy Ereımentaý aýdanyndaǵy Kóbeıtuz kólin 49 jylǵa rekreatsııalyq maqsatta jalǵa berilmeıtinin jarııalady, dep habarlaıdy QazAqparat.
Oblystyq basqarma buǵan deıin jarııalanǵan konkýrstyń birinshi tarmaǵy alynyp tastalǵanyn aıtty.
«Aqmola oblysynyń Tabıǵı resýrstar jáne tabıǵatty paıdalanýdy retteý basqarmasy rekreatsııalyq maqsatta jalǵa berý boıynsha konkýrs tizimindegi sý obektileri arasynan Kóbeıtuz kólin alyp tastady», - deıdi basqarma.
Buǵan deıin Aqmola oblysynyń tabıǵı resýrstar jáne tabıǵatty paıdalanýdy retteý basqarmasy Kóbeıtuz ben Qorjynkól kólderin 49 jylǵa jalǵa berýge baıqaý jarııalaǵan edi.
Eske salsaq, elordadan 170 shaqyrym jerde ornalasqan Kóbeıtuz kóline karantın bitkenshe barýǵa tyıym salynǵan bolatyn.
Endi Kóbeıtuz kólinen tuz ben batpaq alǵandar jaýapkershilikke tartylady.
