Kóbeıtuz kólindegi mobıldi beketter qalaı jumys isteıdi
Sanıtarlyq normanyń saqtalýy úshin Aqmola oblystyq polıtsııa departamenti bastyǵynyń tapsyrmasy boıynsha Kóbeıtuz kóline baratyn eki kólik jolynda úsh mobıldi beket qoıylǵan. Olar tyıym salynǵan kól aýmaǵyna kirý jáne shyǵatyn tusty baqylaıdy.
Kól jaǵalaýy mańyn qosymsha polıtsııa ekıpajdary sholyp júredi. Karantın shekteýleriniń saqtalýyna 15 polıtsııa qyzmetkeri, sonymen qatar aýdan ákimdigi men sanıtarııa salasynyń qyzmetkerleri jumyldyrylǵan.
Sondaı-aq aýdannyń jergilikti atqarýshy organdary kól jaǵasyna kólik óte jaqyn kelmeýi úshin jasandy kedergi ornatýdy qolǵa aldy. Alǵashqy demalys kúnderi ǵana osy mańda polıtsııa 34 ákimshilik quqyqbuzýshylyqty anyqtady. Adamdar 18 ret qoǵamdyq tártipti buzyp, 16 jaǵdaıda jol qaýipsizdigine qater tóndirgen.
Eske sala ketsek, Ekologııa, geologııa jáne tabıǵı resýrstar mınıstrligi Kóbeıtuzdyń lastanyp, ol jaqtan tuzdyń tıelip áketilýine baılanysty alańdaýshylyq bildirdi. Keıin Kóbeıtuz jáne sol mańdaǵy taǵy úsh kól karantınge jabylyp, onda barýǵa tyıym salyndy. Sonymen qatar, kóldiń tuzyn satqandar anyqtaldy. Aqmola oblysynyń polıtseıleri kóligimen kólge kirip ketken adamnyń tabylyp, jazalanǵanyn habarlady.
Aqmola oblysynyń tabıǵı resýrstar jáne tabıǵatty paıdalanýdy retteý basqarmasy Kóbeıtuz ben Qorjynkól kólderin 49 jylǵa jalǵa berýge baıqaý jarııalaǵan edi. Keıinnen Kóbeıtuz jalǵa berilmeıtin boldy.
