Kóbeıtuz, kesilgen aǵashtar jáne qoqys jınaý – Nur-Sultanda ekologııalyq ertegiler jınaǵy jaryq kórdi
NUR-SULTAN. QazAqparat – Nur-Sultanda «Grıneıkter hıkaıasy» atty ekologııalyq ertegiler jınaǵy tanystyryldy, dep habarlaıdy QazAqparat Óndirýshilerdiń keńeıtilgen mindettemeleri (ÓKM) operatoryna silteme jasap.
Balalarǵa arnalǵan basylym bes bólimnen turady, onda Taza qala sıqyrly shaharynyń kishkentaı jáne erjúrek turǵyndarynyń bastan keshken oqıǵalary baıandalady. Kitaptyń tusaýkeserin QR Ekologııa, geologııa jáne tabıǵı resýrstar mınıstrligi, «ÓKM Operatory» JShS jáne Nur-Sultan qalasynyń bilim berýdi jańǵyrtý ortalyǵy uıymdastyrǵan.
«Kitapta basty keıipkerler beıbereket shashylǵan qoqystarmen kúresip, qaldyqtardy bólek jınaýdy nasıhattaıdy. Sondaı-aq, Kóbeıtuz qyzǵylt kóli men jasyl jelekti ormanymyzdy qorǵaý joldaryn kórsetedi. Erteginiń jaǵymdy keıipkerleri arqyly balalardy ıgi ister men tabıǵatqa uqypty qaraýǵa, ekologııalyq pedagogıka ádisi negizinde jas urpaqty tárbıeleý jatyr. ÓKM Operatorynyń qoldaýymen jaryqqa shyqqan ertegilerdiń avtory – №83 mektep-gımnazııasynyń oqytýshysy Asqar Muqanov. Sondaı-aq erteginiń jaryqqa shyǵýyna sol mekteptiń bastaýysh synyp muǵalimderi atsalysqan. Kitap qazaq jáne orys tilderinde jazylǵan», - dep habarlady ÓKM operatorynyń baspasóz qyzmeti.
Ertegi keıipkerleriniń obrazdary #Qaıtaóńdeýge baıqaýynda top jarǵan sýretshi balalardyń salǵan keıipkerlerinen alynǵan. Sýretshi-ıllıýstrator Irına Hvan atalǵan keıipkerlerge pishin berip, olardy kitap betterine kóshirgen.
Avtorlardyń aıtýynsha, kitap otbasymen birge oqýǵa arnalǵan jáne qorshaǵan ortaǵa uqypty qaraýǵa tárbıeleıdi. Ekologııalyq daǵdyny qalyptastyryp, turmystyq qaldyqtardy bólek jınaýdy nasıhattaıdy.
«Sonymen birge, búgin «Rojdennye mechtat» komıksiniń onlaın tusaýkeseri ótti. Grafıkalyq romanda jasóspirimder ekologııalyq máseleni sheshý úshin kúsh biriktiredi. Komıks avtory – Nur-Sultan qalasynyń lıngvıstıkalyq kolledjiniń stýdenti Eva Agafonova. Ekologııalyq ertegiler serııasy men komıks ÓKM Operatorynyń «EcoQolday» ekologııalyq qozǵalysy aıasynda daıyndaldy. Kompanııa daryndy jastardyń ekologııalyq jobalaryn qoldaýǵa árqashan da nıetti. Ekobilim berý jumysy aıasynda ekologııalyq ertegilerdiń jańa serııalaryn shyǵarý, grıneıkterdiń oqıǵalary týraly anımatsııalyq mýltfılmder men balalar spektaklin daıyndaý josparlanýda», - deıdi kompanııa.
