Qobda aýylynda Álııa Moldaǵulovanyń 100 jyldyǵy dúrkirep ótti
AQTÓBE. KAZINFORM – Qazaqtyń mergen qyzynyń mereıtoıyna 80 kıiz úı quryldy, osylaısha etnoaýyl boı kóterdi. Ǵasyrlyq toıǵa jınalǵan qonaqtar qazaqtyń ulttyq oıyndaryn tamashalap, altybaqanda oınap, qazaqtyń ulttyq taǵamdarynan dám tatty.
Bıyl Keńes Odaǵynyń Batyry, qazaqtyń mergen qyzy Álııa Moldaǵulovanyń týǵanyna - 100 jyl. Uly esimdi ulyqtaý maqsatynda Aqtóbe óńirinde jyl basynan beri mádenı-tanymdyq, rýhanı sharalar uıymdastyrylyp jatyr. Eń aýqymdysy 12 jáne 13 maýsym kúnderine josparlanǵan.
Búgin Qobda jerinde «Álııa - qaharmandyq dastany» atty keń kólemdi is-shara uıymdastyryldy. Mereıtoıǵa QR Prezıdentiniń keńesshisi Málik Otarbaev, oblys ákimi Ashat Shaharov, batyrdyń týystary men ózge de mártebeli meımandar qatysty.
Aımaq basshysy kópshilikti ult maqtanyshynyń mereıtoıymen quttyqtady.
«Qobda óńiri - talaı batyr men tulǵalardy dúnıege ákelgen qasıetti meken. Solardyń ishinde Álııanyń orny erekshe. Álııa apamyzdyń erligi - búgingi urpaq úshin bıik rýhtyń, jigerdiń, patrıotızmniń naǵyz úlgisi. Onyń esimi tarıh betterinde altyn árippen jazylyp, halqymyzdyń júreginde máńgi saqtalady.
Búgingi is-shara ótkenge taǵzym, erlikke kórsetilgen qurmet. Bul - jas urpaqqa úlgi bolarlyqtaı, olardyń boıyna otansúıgishtik pen adamgershilik qasıetterdi sińirý jolyndaǵy mańyzdy shara», - dedi oblys ákimi.
QR Prezıdentiniń keńesshisi Málik Otarbaev qatysýshylardy Memleket basshysy Qasym-Jomart Toqaevtyń atynan aıtýly kúnmen quttyqtap, Álııa Moldaǵulovanyń erligin urpaq jadynda máńgi qaldyrýǵa atsalysyp júrgen jandarǵa alǵysyn bildirdi.
Qonaqtar Álııa Moldaǵulovanyń ómiri men erligi órnektelgen teatrlandyrylǵan kórinisti tamashalady. Bulaqta týyp ósken qarshadaı qazaq qyzynyń ǵumyry sahnalyq qoıylymda erekshe beınelengen. Spektakl tarıhty ǵana emes, batyr qyzdyń boıyndaǵy Otanǵa degen súıispenshilikti, erlik pen eldikti, rýh pen kúshti aıyryqsha kórsetti.
Merekelik kóńil-kúı kontserttik baǵdarlamamen jalǵasty. Ǵazıza Jubanova atyndaǵy oblystyq fılarmonııa ártisteri men qobdalyq ónerpazdardyń jarqyn nómirleri kórermenge erekshe áser syılady.
Oblys ákimi Ashat Shaharov Prezıdent keńesshisi Málik Otarbaevpen birge etnoaýyldaǵy Álııa Moldaǵulova, Mánshúk Mámetova jáne Hıýaz Dospanovanyń ómir tarıhynan túrli derekter qamtylǵan kóshpeli mýzeı-kıiz úıge kirip shyqty. Sondaı-aq, ulttyq sport túrleri – báıge men qazaq kúresinde baq synaǵan sportshylardyń sheberligin tamashalady.
Aıtyp óteıik, 7 shaqyrymdyq qunan báıgede Túrkistan oblysy Sozaq aýylynan kelgen shabandoz márege birinshi jetse, Oıyl aýdany - ekinshi, Shalqar aýdany - úshinshi oryndy ıelendi.
Sharadaǵy jyly atmosferaǵa, kórsetilgen qurmetke jáne batyr esimin ulyqtap, eske alǵan sátterge Álııanyń týystary razy.
«Ákem Álııany jıi eske alatyn. Ol bala kezinen-aq basqa balalardan erekshelenetinin aıtatyn. Álııa shapshań, jaýapkershiligi mol, bilimge qushtar bolǵan. Ákem onyń qamqorlyǵy men meıirimdiligin únemi aıtyp otyratyn. Jasyna qaramastan, ol ózgelerge janashyrlyq tanytyp, kómektese bilgen eken. Biz ol týraly uzaq tebirene alamyz — Álııanyń boıynda sheksiz jylýlyq, qýat, rýh kúshi bar edi. Ol bizdiń otbasymyzdyń jadynda óshpes iz qaldyrdy. Ol biz úshin jaı ǵana batyr emes, ol — otbasymyzdyń bir bólshegi, maqtanyshymyz, jan jaramyz jáne máńgilik saǵynyshymyz», - deıdi Álııa Moldaǵulovanyń aǵasy Bısembaı Habıevtiń qyzy Arııa Habıeva.
Aqtóbede ataýy joq kóshelerge 26 soǵys ardagerleriniń esimi beriledi.