Qobda aýdanynda sý tasqynynan zardap shekkenderge arnalǵan úılerdiń keıbiriniń shatyry jabylyp jatyr
AQTÓBE. KAZINFORM – Aqtóbe oblysy Qobda aýdanynda 151 úıdiń qurylysy júrip jatyr. Mamyr aıynyń basynda bastalǵan keıbir qurylys osy aıda aıaqtalady. Úı ıeleri jerebe arqyly anyqtalady.
Aqtóbe oblysy Qobda aýdanynda qurylys jumysy erte bastaldy. Aýdan boıynsha 151 úı salynyp jatyr. Onyń kóbi Qobda aýylynda bolsa, 17-i Jaryq aýylynda. Qobda aýdany ortalyǵynda sý, gaz, jaryǵy bar jer teliminde birneshe qurylys kompanııasynyń jumysy qyzý.
- Qurylys jumysy 2 aıda aıaqtalady dep kelisildi. Biraq qurylys sapasy úshin olardy asyqtyrmaımyz. Oblys boıynsha qurylys aldymen osy Qobdada bastaldy. Qurylysty júrgizip jatqan 15 kompanııanyń árqaısysynyń jyldamdyǵy árqalaı. Keıbiri qabyrǵasyn qalasa, keıbiri ishki árleý jumysyna kóshti. Shatyryn jaýyp jatqan kompanııalar da bar. Barlyq úılerdi tehnıkalyq, avtorlyq baqylaýshylar baqylap júr. Sonymen birge qurylys alańyna 5 beınebaqylaý kamerasy qondyrylǵan,- dedi Qobda aýdanynyń ákimi Іzgilik Tynymgereev.
Qobda aýdanynyń turǵyndary ázirge týǵan-týystarynyń úıinde, keıbiri páter jaldap otyr. Taǵy bir toby aýlasyndaǵy jazǵy úılerine qonystanǵan. Evakýatsııalyq bekette eshkim joq. Al jańadan salynyp jatqan úılerdiń qaısysyna kimniń qonystanatyny ázirge belgisiz.
- Úı ıesi jerebe arqyly tańdalady. Osy sheshim ádil bolmaq. Byltyr da osy ádispen tańdaldy. Bizde múgedektigi bar adam turatyn bir otbasy bar. Olar ýaqytsha baspanamen qamtylǵan. Ol otbasyna túsken úıdi qurylys kompanııasymen kelisip, yńǵaıly etip beremiz,- dedi Іzgilik Tynymgereev.
Mundaǵy qurylys kompanııalarynyń júktemesi ártúrli. Biri 6 úı salsa, endi biri 8 úıdiń qurylysyn óz mindetine alǵan. Keıbir kishigirim jumysqa jergilikti turǵyndar tartyldy. Olar bilgili bir jumysty atqaryp, sol úshin eńbekaqy alady.
- Bizdiń qurylys kompanııa qazir úıdiń shatyryn jabý jumystaryn júrgizip jatyr. Іrgetasy quıylyp, qabyrǵasy qalanyp tur. Osy aptada terezesi salynady, ishki bólmeleri bólinedi. Al kelesi aptada ishki árleý jumysy bastalady. Sonymen birge káriz júıesine arnalǵan shuńqyr qazylady. Bul jerdegi qurylys mamyr aıynyń basynda bastaldy. Qurylys zańdylyǵy boıynsha irgetasyn quıýǵa arnalǵan jer qazylady. Ony nyǵyzdap, qıyrshyq tas tóseledi. Sodan keıin tor salyp, tsement quıylady. Sodan árqaısysy 60 sm bolatyn eki blok qoıyldy. Bul úıdiń negizi, irgetasy. Munda keıde aýyl adamdary kelip, úıdiń bólinisin qaraıdy,- dedi «ASM 2012» JShS-niń proraby Erkin Dúıseev.
Úı salý jumystaryna birneshe brıgada tartylady. Biri irgetasyn quıyp ketse, endi biri qabyrǵasyn qalaıdy. Tóbesin jatatyn brıgada da bólek.
- Bizdiń kompanııa 8 úı salyp jatyr. Jumys mamyr aıynda bastaldy. Bul úılerdi 3 brıgada salyp jatyr. Jumys 8:00-den 20:00-ge deıin jalǵasady. Túste bir saǵattan úzilis bar. Bári de belgili bir jumys kólemin óz mindetine alǵan soń ýaqytpen sanaspaı júre beredi. Jumysshylardyń kóbi aýyldan emes, sondyqtan qurylys basynda qonady. Úıdiń bári birdeı. Tórt bólmeli. Bir zal, úsh jatyn bólme men as bólmesi bar. Jýynatyn bólme, ájethanasy da qarastyrylǵan,- dedi «Stroı bıld» JShS ókili Murat Mahmetov.
Aıta keteıik, Qobda aýdanyndaǵy apatty úılerdiń ıeleri eski baspanasynyń qurylys materıalyn qajetine jarata alady. Al jerin memleketke qaıtarady. Bul aýmaqqa úı salynbaıdy dep kelisilgen.
