Koalıtsııa ókilderi Qyzylordada oblys halqyna úndeý jarııalady
QYZYLORDA. QazAqparat - Qyzylordada "Qazaqstan 2050" Demokratııalyq kúshterdiń jalpyulttyq koalıtsııasy aımaqtyq fılıalynyń ókilderi elimizde júrgizilgeli otyrǵan Konstıtýtsııalyq reformany qoldaýǵa qatysty óz úndeýin jarııalady, - dep habarlady QazAqparat HAA tilshisi.
«Nur Otan» partııasy oblystyq fılıalynyń uıymdastyrýymen "Qazaqstan 2050" Demokratııalyq kúshterdiń jalpyulttyq koalıtsııasynyń otyrysy ótti. Otyrysqa koalıtsııa músheligindegi partııalar jetekshileri men belsendileri, ÚEU jáne QHA ókilderi, belsendi jastar men BAQ ókilderi qatysyp, Elbasy Nursultan Nazarbaevtyń bılik tarmaqtary arasynda ókilettikterdi bólýge qatysty Qazaqstan halqyna jasaǵan úndeýine oraı elimizde júrgiziletin Konstıtýtsııalyq reformanyń saıası jáne tarıhı mańyzdylyǵyn talqylady.
Keńes otyrysyn ashqan «Nur Otan» partııasy Qyzylorda oblystyq fılıaly tóraǵasynyń birinshi orynbasary Ibadýlla Quttyqojaev aldymen Elbasynyń sarabdal saıasaty nátıjesinde jetken elimizdiń búgingi jetistikterin jan-jaqty baıandady. Búgingi kúni bılik tarmaqtarynyń arasynda ókilettikterdi bólýge qatysty elimizde júrgiziletin Konstıtýtsııalyq reforma men «Qazaqstannyń úshinshi jańǵyrýy: jahandyq básekege qabilettilik» atty Elbasy Joldaýy búkil álemniń nazaryn aýdaryp otyrǵandyǵyn jetkizdi. Sondaı-aq jıylǵandardy Joldaýda aıtylǵan mindetterdi júzege asyrýǵa jáne Elbasy úndeýin qoldaýǵa shaqyrdy.
Keńes otyrysynda koalıtsııa músheligindegi barlyq partııa ókilderi oılaryn ortaǵa salyp, úkimettik emes uıymdar pikirleri tyńdaldy. Maqsat ortaq - Memleket basshysynyń Konstıtýtsııa kepili retinde qabyldaǵan jańa tarıhı sheshimin qoldaý, qazaq qoǵamyndaǵy saıası turaqtylyq pen ekonomıkanyń qarqyndy damýyna birlese úles qosý.
Jıyn qorytyndysy boıynsha aımaqtyq koalıtsııa ókilderi Úndeý qabyldady. Onda elimizdiń Tuńǵysh Prezıdentiniń kóshbasshylyǵy jáne jalpy álemdegi myqty, tabysty memleket retinde táýelsiz Qazaqstandy qurýdaǵy prezıdenttilik ınstıtýtynyń tarıhı mańyzy, Qazaqstan Prezıdentiniń saıası júıeni odan ári demokratııalandyrý úshin memlekettik bılik tarmaqtary arasynda ókilettikterdi qaıta bólý, sondaı-aq "Bes ınstıtýtsıonaldy reformany" júzege asyrý, elimizdiń álemdegi 30 jetekshi memlekettiń qataryna kirý boıynsha «Qazaqstan-2050» Strategııasynyń maqsattaryna qol jetkizý baǵytynda usynylyp otyrǵan reformasynyń mańyzdylyǵy baıan etilgen.
